Tilin qaıshymen tilgilegen: jábir kórdim degen bala oqıǵany oıdan qurastyrǵany anyqtaldy

PAVLODAR. KAZINFORM — Pavlodarda eki sotqar bala jeti jasar jetkinshektiń tilin qaıshymen tilgilegeni týraly aqparat jalǵan bolyp shyqty. Bala ákesiniń nazaryn aýdartý úshin oqıǵany oıdan shyǵarǵan.

Jergilikti polıtsııa qyzmetkerleri qozǵalǵan qylmystyq is sheńberinde aýmaqta keshendi is-sharalar júrgizgen. Kórshilerdi surastyrý, oqıǵa ornyn qaraý jáne beınebaqylaý kameralaryndaǵy jazbalardy taldaý nátıjesinde kámeletke tolmaǵan balanyń soqqyǵa jyǵylǵany týraly derekter rastalmady.

— Anyqtalǵandaı, jasóspirim aýlada átkenshekte oınap júrip, qyzyǵýshylyqpen erni men tilin metall bólikke ózi tıgizgen. Aıazdan tili men erni qanap qalǵan. Al bala qandy kórgen soń qoryqqan ári ákesiniń nazaryn aýdartý maqsatynda «sotqarlar urdy, qaıshymen tilimdi keskiledi» degen oqıǵany oıdan shyǵarǵan, — dep habarlady óńirlik polıtsııa departamentinen.

Anasynyń qatysýymen balamen profılaktıkalyq áńgime júrgizilgen. Zańdy ókiline mektep psıhologynyń konsýltatsııasyna júginý usynylǵan. Sondaı-aq, bala saýyǵyp shyqqan soń onyń jáne zańdy ókiliniń áreketteri Kámeletke tolmaǵandardyń isteri jáne olardyń quqyqtaryn qorǵaý jónindegi komıssııada qaralatyn bolady.

Polıtsııa buǵan qosa azamattardy tek resmı jáne rastalǵan aqparatqa senýge shaqyrdy. Quqyqqa qaıshy áreketter ákimshilik jáne qylmystyq jaýapkershilikke ákep soǵatynyn eskertedi.

Oblystyq balalar aýrýhanasynyń ókilderi balada bas súıek-mı jaraqaty qaıdan paıda bolǵanyn aıta almaı otyr.

Buǵan deıin, Pavlodarda sotqarlar jeti jasar balanyń tilin qaıshymen tilgilegeni týraly jazǵanbyz.