Tilendıev kóshesi uzartylady: Almaty ákimdigi buzylatyn úılerge qatysty túsinik berdi

ALMATY. KAZINFORM — Almaty qalasyndaǵy Ójet shaǵynaýdanynyń turǵyndary Tilendıev kóshesiniń uzartylýyna baılanysty úıleriniń súrilýine taǵy da qarsy shyqty. Baspanaly buzylady degendi estigen jurt ákimdikten jobany qaıta qaraýdy surady. 

Turǵyndardyń aıtýynsha, 120-ǵa jýyq jer telimi alynýy múmkin, al bul kóptegen otbasynyń jalǵyz baspanasy. Olar ákimdiktiń mundaı áreketteri jeke menshik quqyǵyn buzý dep esepteıdi.

Qalalyq mobıldilik basqarmasynyń málimetinshe, 2025 jyldyń 27 maýsymda Tilendıev kóshesiniń uzartylýynyń ekinshi kezeńin iske asyrý týraly qaýly qabyldanǵan.

Bul joba magıstraldy Úlken Almaty aınalma avtomobıl jolyna qosýǵa baǵyttalǵan, bul ońtústik aımaqtardaǵy kólik júktemesin azaıtýy tıis. Qujat 120 jer telimin satyp alýdy kózdeıdi, al menshik ıelerine eskertý hattary jiberile bastady.

— Qazir jyljymaıtyn múlikti májbúrlep alyp qoıý týraly qaýlymen tanystyrý kezeńi júrip jatyr. Aıta ketý kerek, eskertýler barlyq turǵynǵa jiberilgen joq — protsess jalǵasyp jatyr. Sonymen qatar, múliktiń naryqtyq qunyn baǵalaý úshin materıaldar jınalyp, daıyndalýda, — dep málimdedi basqarmadan.

Sondaı-aq, basqarma jer telimderin satyp alý táýelsiz baǵalaý kompanııalarynyń sol sáttegi naryqtyq quny boıynsha júrgiziletinin atap ótti.

Barlyq is-shara zań aıasynda jáne azamattardyń quqyqtary men múddelerin eskere otyryp atqarylady.

Qalalyq mobıldilik basqarmasynyń málimetine sáıkes, Tilendıev kóshesin uzartý Almatynyń 2040 jylǵa deıingi Bas josparyna engizilgen jáne Úkimetpen bekitilgen. 
Onyń aıasynda Tilendıev kóshesi Rysqulov dańǵylynan bastap qala shekarasyna deıin 10,8 shaqyrymǵa uzartylmaq. Jumys eki kezeńge bólingen.

— Birinshisi — Rysqulov dańǵylynan Darhan shaǵyn aýdanynan Sabataev kóshesine deıin, uzyndyǵy — 5,8 km. Joba boıynsha 165 jer ýchaskesi satyp alynady. Ekinshisi — Sabataev kóshesinen qala shekarasyna deıin, uzyndyǵy — 4,9 km. Satyp alynatyn jer ýchaskeleriniń sany — 392, — dep habarlady qalalyq ákimdikten.

Ákimdikten atap ótkendeı, Tilendıev kóshesiniń trassırovkasyn ózgertý múmkin emes. Sebebi batys jaǵynda jol salýǵa bolmaıtyn úlken saı bar. Joldyń qyzyl syzyqtarynyń shyǵysqa qaraı jyljýy satyp alynatyn jer ýchaskeleriniń odan da kóp bolýyna ákeledi.

Eske salaıyq, N.Tilendıev kóshesi men Soltústik aınalma joly soltústik baǵytta Úlken Almaty aınalma avtomobıl jolyna deıin uzartylatyny 2021 jyly belgili bolǵan. 
Keıin Ójet shaǵyn aýdanynyń turǵyndary jalpyqalalyq mańyzy bar Tilendıev kóshesiniń uzartylýyna narazylyq bildirgen edi.