«Til-Qazyna» ortalyǵy men «Qazaq tili» qoǵamy yntymaqtastyq memorandýmyna qol qoıdy
ASTANA. KAZINFORM – Halyqaralyq «Qazaq tili» qoǵamy» qoǵamdyq birlestigi men «Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy» KeAQ ózara yntymaqtastyq týraly memorandým jasasty.
Basqosý barysynda Halyqaralyq «Qazaq tili» qoǵamynyń prezıdenti Raýan Kenjehanuly jáne «Til-Qazyna» ulttyq ǵylymı-praktıkalyq ortalyǵynyń bas dırektory Maqpal Jumabaı atalmysh qujatqa qol qoıyp, birlesken is-sharalar josparyn bekitti.
Til úıretýdegi ádistemelik jumystardyń biryńǵaı júıesin jasaý, til úıretýge arnalǵan platformalardy damytý, ádistemelik oqý quraldarynyń jappaı satylymǵa shyǵýyn uıymdastyrý, álemdik jáne otandyq kórkem ádebıetti til úırený deńgeılerine sáıkes beıimdeý boıynsha jobalardy birlesip atqarý kelisildi. Oǵan qosa jalpyulttyq Dıktant jobasyn birlese ótkizý maqsaty qoıyldy.
«Halyqaralyq «Qazaq tili» qoǵamy» qoǵamdyq birlestigi – qazaq tiliniń mártebesin kóterý, qoldanys aıasyn keńeıtý jáne ulttyq mádenıetti nasıhattaý maqsatynda jumys isteıtin bedeldi qoǵamdyq uıym. Tarıhy 1989 jyldan bastalatyn Qoǵam respýblıka jáne odan tys jerlerdegi til janashyrlaryn biriktirip, túrli aýqymdy jobalardyń bastamashysy jáne uıymdastyrýshysy bolyp keledi.
«Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy» kommertsııalyq emes aktsıonerlik qoǵamy – ǵylymı zertteýler júrgizý, qazaq tilin úıretýdiń ǵylymı-ádistemelik negizderin júıeleý, qazaq tilin ǵylym tili retinde jetildirý, termınologııany birizdendirý, balalar men eresekterge arnalǵan kontentti jetildirý, qazaq tilin tsıfrlandyrý men jasandy ıntellekt baǵytyndaǵy qyzmetterdi júzege asyratyn ortalyq. Ol Qazaqstan Respýblıkasy Úkimetiniń Qaýlysymen 2018 jyly qaıta qurylǵan.