Til alýandyǵy — Qazaqstannyń erekshe artyqshylyǵy — Prezıdent maqalasy

ASTANA. KAZINFORM — Prezıdent Qasym-Jomart Toqaev Reseıdiń «Rossııskaıa gazeta» basylymyna shyqqan «Máńgilik dostyq — halyqtarymyzǵa jol silter temirqazyq» atty avtorlyq maqalasynda Qazaqstandaǵy til saıasatynyń keleshegine toqtalǵan. 

— Men eldegi til alýandyǵyn árdaıym erekshe artyqshylyǵymyz dep sendim. Qazaqstanda ondaǵan mádenıet beıbit ómir súredi jáne bir-birin ózara baıytady. Orys tili Qazaqstanda qoǵamnyń áleýmettik-saıası, rýhanı ómiriniń, ǵylym men bilimniń ajyramas elementi retinde tanylǵan jáne aıryqsha qoldaýǵa ıe.

Biz orys tilin qoldaýdy halyqtar arasyndaǵy dıalog pen senimdi nyǵaıtatyn keń gýmanıtarlyq ózara is-qımyldyń bóligi retinde qarastyramyz. Sondyqtan men orys tilin damytatyn halyqaralyq uıym qurý týraly bastama kóterdim, — dep jazady Qasym-Jomart Toqaev.

Prezıdent Qazaqstan jastary qazaq, orys tilderimen qatar aǵylshyn, qytaı jáne t. b. tilderdi meńgerýge tıis ekenin aıtady.

— Qorytyndylasaq, Astana men Máskeýdiń qarym-qatynasy búkil Eýrazııa keńistigindegi kóptegen irgeli protseske sheshýshi áser etetinin taǵy da atap ótkim keledi.

Bizdiń yntymaqtastyǵymyz jansyz formaldylyq pen ınertsııadan ada — ol shyn máninde jandy jáne serpindi, ýaqyt synaǵyna tótep berip qana qoımaı, jańa dáýirdiń qıyndyqtaryna ıkemdi tótep bere alady.

Álem jańa baǵdarlardy izdep jatqan kezeńde Eýrazııa senimdi tirek kózderine, konıýnktýradan ada, ortaq taǵdyr ıdeıasynan qorek alatyn odaqtastyqqa muqtaj.

Qazaqstan men Reseı halyqtary bolashaqqa tarıhı jáne rýhanı tamyrǵa adal bola otyryp umtylady. Bul bizdiń elderimizdiń strategııalyq seriktestigi men odaqtastyǵy árqashan búkil qurlyq úshin jasampazdyqtyń, qaýipsizdik pen yntymaqtastyqtyń tiregi bolatynyna senimdilik beredi, — dep túıindedi Memleket basshysy. 

Aıta ketelik Máskeýde «Qazaqstan–Reseı dostyǵy skveri» ashylady.