TQJB Jılstroıbek esimdi bala týraly aqparatty tekserdi
ASTANA. QazAqparat - Buǵan deıin Áleýmettik jeliler men uıaly baılanys messendjerlerinde Jılstroıbek esimi berilgen sábıdiń týý týraly kýáliginiń fotosy paıda bolǵany týraly jazylǵan edi.
Ata-ana mundaı esimdi Turǵyn úı qurylys jınaq bankinen baspanaly bolǵannan keıin qoıǵany aıtyldy. Alaıda banktiń qoǵammen baılanys departamentiniń dırektory Ermek Boltaev QazAqparat tilshisine bergen suhbatynda ol aqparatty joqqa shyǵardy.
«Bas kezinde ondaı jańalyqty estigende ózimiz de qyzyǵyp kettik. Sodan ol kýáliktiń túpnusqalyǵyn, ata-analary bizde tirkelgenin, ne tirkelmegenin tekserdik. Aqyrynda feık bolyp shyqty. Biz ol kýáliktiń qaıdan shyqqanyn da bilip aldyq. Ol adamdardyń aty-jónin aıta almaımyn. Olar Shymkentte turady. Ózderinshe ázildegisi kelgeni ǵoı», - dedi E.Boltaev.
Departament basshysynyń aıtýynsha, bank bundaı PR-sharany aldyn ala oılastyryp jasamasa da, jalǵan kýáliktiń fotosy ǵalamtor arqyly jyldam tarap ketken.
Aıta keteıik, fotoda týý týraly qujattyń OńtústikQazaqstan oblysy Shymkent qalasynda berilgeni kórinip tur. Jılstroıbektiń tegi - Batyrbek. Ákesiniń aty - Erkebulan.
Buǵan deıin habarlaǵanymyzdaı, áleýmettik jeliler arqyly taralǵan qujattyń túpnusqalyǵy rastalmasa da, ǵalamtor qoldanýshylary bul jańalyqty ájýaǵa aınaldyryp úlgerdi.
