Tikushaqtar Pavlodar men Qaraǵandy shekarasyndaǵy órt oshaqtaryna 22 tonna sý tókti
PAVLODAR. KAZINFORM — Pavlodar men Qaraǵandy oblystarynyń shekara aýmaǵyndaǵy tabıǵı órtti sóndirý jumystary jalǵasyp jatyr. Ekpindi jel, taýly jerler jáne órt oshaqtaryna kirme joldardyń bolmaýy órtti sóndirý jumystaryn qıyndatyp otyr.
QR Tótenshe jaǵdaılar mınıstrliginiń baspasóz qyzmeti habarlaǵandaı, qazirgi ýaqytta Qaraǵandy jáne Pavlodar oblystary, Astana qalasy TJD kúshteri men jergilikti atqarýshy organdarynan, TJM 52859 áskerı bóliminen, «Baıanaýyl» MUTP-dan jalpy sany 609 adam jáne 110 birlik tehnıka, «Qazavıaqutqarý» AQ men QR Qorǵanys mınıstrliginen 4 áýe kemesi órtti joıý jumystaryna jumyldyryldy.
«Qaraǵandy oblysynyń Terekti aýylynda jáne Pavlodar oblysynyń Jeltaý qystaǵynda órt orny dalalyq órt sóndirý shtabtary ornalastyryldy. Órtti sóndirý jumystary jerústi jáne áýe kólikterimen júrgizilip jatyr. Jalpy 12 jaýyngerlik ýchaske anyqtaldy. Oblystyq TJD jáne TJM Komandalyq ortalyǵynda jedel shtabtar jumys istep jatyr. Áýe kemeleri órt oshaqtaryna 15 ret baryp, jalpy kólemi 22 tonna sý tókti», — dep málimdedi mınıstrlikten.
Mınıstrlik buǵan qosa, aqparattyq-psıhologııalyq qoldaý kórsetý úshin Qaraǵandy oblysynyń TJD 8 721 2 51 72 23, Pavlodar oblysynyń TJD 8 718 2 20 11 12 jedel jeli telefondary jumys isteıtinin eske saldy.
Eske sala keteıik, 6 qazan kúni Baıanaýylda jer órtenip, bir aýyldyń turǵyndary qaýipsiz aýmaqqa kóshirildi.
Órt shalǵan jerge jaqyn ornalasqan Jumat Shanın aýylyna qaýip tónip turǵan joq
Al búgin túske taman Pavlodar oblysynyń ákimi Baıanaýyldaǵy órttiń oqshaýlanǵanyn habarlady.
