Tikushaqtar men órt poıyzy jumyldyryldy: Qostanaı oblysyndaǵy dala órti sóndirildi

ASTANA. KAZINFORM - Búgin Qostanaı oblysy Qamysty aýdany Arqa aýylynan 15 shaqyrym jerde aldyn ala boljam boıynsha 5000 ga alańda qurǵaq shóp órtendi, dep habarlaıdy QR Tótenshe jaǵdaılar mınıstrliginiń baspasóz qyzmeti.

Baspasóz qyzmetiniń málimetterine qaraǵanda, jeldiń ekpini 25 m/s deıin jetip, órttiń taralýyna ákelýi múmkin boldy. Órttiń memlekettik qordyń orman alqabyna ótý qaýpi týyndady.

Órt oshaqtaryna dereý qutqarýshylar toptary, onyń ishinde órt sóndirý avıatsııasy tartyldy.

Órtti sóndirýge jeke quramnan 200-ge jýyq adam, TJD, JAO 33 tehnıkasy, tikushaqtar men órt poıyzy jumyldyryldy. 7 ret jalpy kólemi 14 tekshe metrden asatyn sý tógildi

TJ mınıstriniń tapsyrmasy boıynsha órt ornyna Órtke qarsy qyzmet komıtetiniń tóraǵasy Ramıl Kamalov, TJ joıý departamentiniń bastyǵy Maqsat Dáýletıarov jáne Qostanaı oblysy TJD bastyǵy Damır Ermaǵambetov jiberildi.

«Qutqarýshylardyń úılesimdi is-qımyldary men órtti aýadan jáne jerústi tásilimen sóndirý boıynsha qabyldanǵan sharalardyń arqasynda órt tolyǵymen sóndirildi. Qazirgi ýaqytta jalyn sharpyǵan aýmaqty naqty kólemi belgilenip jatyr. Qaıtys bolǵandar men zardap shekkender joq»,-delingen habarlamada.

Osyǵan deıin Petropavlda órtengen turǵyn úıden úsh adamnyń denesi tabylǵanyn jazǵan edik.