Tikushaqpen ketip, qaıyqpen oraldy: Jas bosanǵan áıeli men qyzyn qarsy alǵan qutqarýshy kópshilikti tánti etti
AQTÓBE. KAZINFORM — Aqtóbelik órt sóndirýshi-qutqarýshy Asqar Qusaınov tótenshe jaǵdaı kezinde áke atandy. Ol Qurman aýylyndaǵy ózen jaǵasyn bekitý jumystarynda júrgende kelinshegi tikushaqpen qalaǵa jetkizilip, bosanǵan soń kólikpen, keıin qaıyqpen úıine oraldy.
Aqtóbe oblysy Oıyl aýdanyndaǵy № 18 órt sóndirý bóliminiń órt sóndirýshi-qutqarýshysy Asqar Qusaınov tasqyn kezinde áke atandy.
Ol 30 naýryzdan bastap kúsheıtilgen tártipte jumysqa kóship, aýdan ortalyǵy mańyndaǵy Qurman aýylyna shuǵyl ketip qalǵan.
Bul jaqta sý bógeý jumystaryn júrgizdi. Tipti baılanys aıasynan tys boldy.
— Ol kezde Oıyl aýdanynda jan-jaqtyń bárinen sýǵa ketip jatty. Qurman aýylynda júrgen soń otbasymmen baılanysqa shyǵa almadym, júkti kelinshegimdi shyǵaryp salýǵa múmkindigim bolmady. Sóıtip eki kún boıy habarsyz júrdim. Aýdanǵa qaıtyp kelgende ǵana ony tikushaqpen alyp ketkenin bildim. Ol 4-sáýir kúni bosanǵan. 04.04.2024. Jaqsy datada bosandy. Sodan 8-sáýir kúni perzenthanadan shyǵaryp aldy. Ózim jumysta bolǵan soń qalaǵa da bara almadym. Oıylǵa kólikpen jetti, al ózen arqyly qaıyqpen júrip óttik. Sebebi aýdanǵa kireberis jol, kópir joq. Arǵy betke baryp, kelinshegimdi, qyzymdy kútip aldym. Qyzymyzdy úıge ákelip, qolymyzǵa aldyq. Esimin Dana dep qoıdym. Er bala bolsa Tasqyn dep qoıatyn edim. Qyzym qıynshylyq ýaqytta danalyǵymen, daralyǵymen erekshelensin dep Dana dep qoıdym. Bul bizdiń ekinshi bópemiz. Kelinshegim stýdent. Bıyl dıplomyn qorǵaýǵa barady. Oqyp ta, kelin bolyp, ana atanyp ta úlgerip jatyr, — dedi Asqar Qusaınov.
Ol buǵan deıin Aqtóbe qalasyndaǵy órt sóndirý bóliminde jumys istegen. Birer jyl buryn Oıylǵa aýysty. Qazir № 18 órt sóndirý bóliminiń órt sóndirýshi-qutqarýshysy.
— Tasqyn kezinde bólim qyzmetkerleri Qaratal, Ekpetal, Jańabaz, Amangeldi, Qurman aýyldaryna bólinip-bólinip ketti. Sol kezde men Qurman, Amangeldi aýyldarynda bóget jasap, halyqqa kómektestim. Bul eki aýylǵa da sý kirmedi. Degenmen turǵyndary aldyn ala evakýatsııalanyp, ortalyqqa jetkizildi. Tilegim — elimiz aman, jurtymyz tynysh bolsa. Órt, sý tabıǵı apat, tizsiz jaý dep aıtady. Elimizdi qıyn-qystaý zamanǵa salmasa, kóldeneńnen keletin apattan saqtasa deımiz. Qoı ústine boztorǵaı jumyrtqalaǵan zaman bolsa eken deımin, — dedi órt sóndirýshi-qutqarýshy.
