Tikushaq, kortej, qymbat kólik: Mańǵystaý túlekteri sońǵy qońyraýdy «shoýǵa» aınaldyrdy
AQTAÝ. KAZINFORM — Mańǵystaýdaǵy bıylǵy sońǵy qońyraý tek mektep merekesi ǵana emes, naǵyz sán-saltanat sherýine aınalǵandaı. Áleýmettik jelide Jańaózen qalasyndaǵy №3 mektep túlekteriniń vıdeosy jurttyń qyzý talqysyna tústi.
Olar jol talǵamaıtyn kólikterden quralǵan uzyn-sonar avtokortej uıymdastyryp, tipti tikushaqpen júrgen beınejazba taratty.
Osy beınejazbaǵa baılanysty Jańaózen qalalyq bilim bólimi resmı jaýap berdi. Aıtýynsha, tikushaq jasandy ıntellektpen jasalǵan.
- 2026 jylǵy 25 mamyr kúni Jańaózen qalasyndaǵy №3 jalpy bilim beretin mekteptiń 11 synyp túlekteri saltanatty is-shara aıaqtalǵannan keıin qala aýmaǵyndaǵy ortalyq alańdarda estelik fotosessııa uıymdastyrǵan. Atalǵan is-shara barysynda túlekter tarapynan 10 avtokólikten quralǵan kortej paıdalanylǵany anyqtaldy. Áleýmettik jelilerde taraǵan beınejazbadaǵy tikushaq kórinisi jasandy ıntellekt baǵdarlamasy arqyly jasalǵany belgili boldy. Sondaı-aq beınematerıalda oqýshylar qolyndaǵy atqylaǵan zattyń kishkentaı balalarǵa arnalǵan sýsyn ekeni naqtylandy, - delingen habarlamada.
Mańǵystaý oblystyq Polıtsııa departamenti 25 mamyr kúni kúsheıtilgen rejımde jumys istep, qosymsha polıtsııa jasaǵyn jumyldyrǵan.
- Ótkizilgen shara barysynda 236 avtokólik mamandandyrylǵan aıyppul turaǵyna qoıylyp, zańnama talaptaryn buzǵan 388 azamat ákimshilik jaýapkershilikke tartyldy. Sonymen qatar áleýmettik jelilerde jarııalanǵan barlyq beınematerıaldy polıtsııa qyzmetkerleri jedel túrde zerdelep, árbir derek boıynsha tıisti tekserý jumystary júrgizilip, qoldanystaǵy zańnama aıasynda sharalar qabyldandy, - delingen habarlamada.
Buǵan deıin Oqý-aǵartý mınıstri Juldyz Súleımenova Jańaózendegi mektep túlekteriniń áreketine qatysty pikir bildirgen bolatyn.
