Tikushaq qona almady: Qaratal aýylynyń turǵyndary sý ortasynda qaldy
AQTÓBE. KAZINFORM – Aqtóbe oblysy Oıyl aýdany Qaratal (burynǵy Bersıev) aýylynyń turǵyndary mektepte, keıbiri óz úıiniń shatyrynda otyr. Búgin bári sol mektepte qonyp shyǵýǵa májbúr. Sebebi tikushaq eki ret qona almaı ketti.
Bersıev aýylyna qarǵyn sý saǵat 12:00 shamasynda kirgen. Sol kezde áıelder bala-shaǵasyn alyp, mektepti panalasa, er adamdar qoradaǵy malyn oılap úıiniń janynda qalǵan. Sý kóterilgende olardyń bári de evakýatsııalyq beketke jete almaı, úıdiń shatyryn panalap ketti.
— Biz qazir mekteptiń ekinshi qabatynda otyrmyz. Munda jaryq joq, gaz joq, jylý joq. Al jertólesi sýǵa tolyp tur. Balalar tońyp qaldy. Ózimiz mektepte otyrsaq, er adamdardyń bári úıdiń tóbesinde júr. Olarmen baılanys úzilip qaldy. Tikushaq eki ret soǵyp, qona almaı ketti. Biz qol bulǵap qaldyq. Jan-jaqqa aıtyp, kómektesińizdershi, — dedi Bersıev aýylynyń turǵyny Gúlhan.
Bersıev aýylyndaǵy jaǵdaıdan jergilikti ákimdik habardar. Tek qoldan keler qaıran joq.
— Mektep — evakýatsııalyq pýnkt. Ol adamdar sol jerde jınalyp otyr. Syrtqa shyǵa almaıdy, sýǵa batyp ketýi múmkin. Jaryq máselesine keler bolsaq, ony qosýǵa bolmaıdy. Elektr togyn qossa, avarııalyq jaǵdaı bolady, jerdiń bári sý bolǵan soń. Búgin keshkilik tikushaqpen 6 adam túsirildi. Olardyń rezeńke kıimi bar. Qolynda rezeńke qaıyǵy da bar. Sol qaıyqpen aýyldyń úılerinde qalyp qoıǵan adamdardy jınap, mekteptiń ekinshi qabatyna kóteredi. Sebebi samannan salynǵan úıler 5-6 saǵattan keıin otyryp qalýy múmkin. Bersıev aýyly boıynsha mektep eń qaýipsiz oryn bolyp tur, — dedi Oıyl aýdany ákiminiń orynbasary Muratbaı Aıdarbaev.
Onyń aıtýynsha, tikushaq jiberilgenimen, eki ret qona almaı ketken.
— Aınalasynyń bári sý, tikushaqtyń qonýy múmkin bolmady. Ol tikushaq keri ketti. Qazirgi kezde biz jibergen 6 adam olarǵa tamaq, sý aparady. Búgin halyq sol mektepte amaldaıdy. Mektep qulap jatqan joq, — dedi Muratbaı Aıdarbaev.
Aıta keteıik, qazirgi kezde Oıyl aýdanynda tótenshe jaǵdaı jarııalanǵan. Evakýatsııalyq beket dep bekitilgen mektep-ınternatta 64, kolledjde 29, al sport mektebinde 27 adam bar. Sonymen birge júzdegen adam týma-týysyna ketti.
