Tikushaq apatynyń aldyn ala sebebi aıtyldy

ASTANA. KAZINFORM — Qorǵanys mınıstrligi Aqtóbe oblysynda tikushaq apatyna qatysty resmı habarlama jasady, dep habarlaıdy vedomstvonyń baspasóz qyzmeti.

Bıylǵy jylǵy 9 qarashada Aqtóbe oblysy Saryjar aýylynyń mańynda Áýe qorǵanysy kúshteri áskerı ınstıtýtynyń Mı-8 tikushaǵy oqý-jattyǵý ushýlaryn oryndaý kezinde apatty jaǵdaıda qondy. Bortta bolǵan 3 ekıpaj múshesiniń 2-eýi aýrýhanaǵa jetkizildi. Olarǵa qajetti medıtsınalyq kómek kórsetildi.

— Ekıpaj músheleriniń biri qaza tapty. Avıatsııalyq oqıǵanyń aldyn-ala sebebi — tehnıkalyq aqaýlyq. Oqıǵanyń mán-jaıy anyqtalýda. Jergilikti jerde vedomstvoaralyq jedel top jumys isteýde. Qarýly kúshterdiń basshylyǵy men Áýe qorǵanysy kúshteriniń qolbasshylyǵy qaza tapqan áskerı qyzmetshiniń týystary men jaqyndaryna kóńil aıtady, — delingen mınıstrlik habarlamasynda.

Vedomstvo atap ótkendeı, onyń týystaryna, sondaı-aq zardap shekkenderge barlyq qajetti kómek kórsetiledi.

Eske salsaq, búgin Aqtóbede tikushaq qulaǵany belgili boldy.

Keıinnen tikushaq apaty kezinde 1 adam kóz jumǵany anyqtaldy.