Tikushaq apaty: Qutqarý operatsııasyna qosymsha 5 áskerı bólimniń kúsh-quraldary tartyldy
ASTANA. KAZINFORM — Sorbulaq sý qoımasy aýdanynda izdeý-qutqarý operatsııasy 28 shilde kúni tańerteń de jalǵasty. Saǵat 04:30–dan bastap sý beti men jaǵalaý mańyn tekserý júrgizildi, dep habarlaıdy Qorǵanys mınıstrliginiń baspasóz qyzmeti.
Sonymen birge ushqyshsyz basqarylatyn qurylǵylardy paıdalaný arqyly aımaqta ushý júrgizildi.
Іzdeýdiń tıimdiligin arttyrý maqsatynda jaǵalaýdyń ońtústik bóligin jerdegi jáne sýdaǵy toptar qosymsha izdedi. Aımaqty jan-jaqty qaraý úshin sý aılaǵy shartty túrde sektorlarǵa bólingen. Sýǵa 13 júzý quraly jumyldyrylyp, túbin tekserýge arnaıy tehnıkalyq quraldar paıdalanylyp jatyr.
Kúni boıy operatsııa júrgiziletin aýdanǵa basqa óńirlerden qosymsha kúsh-quraldar jetkizildi. Onyń ishinde Qonaev qalasynan — izdeý bólimshesi, oǵan qosa Aqtaý qalasynan — A-400 áskerı-kólik ushaǵymen jetkizilgen jeke quram men tehnıka da bar. Quramynda sý aıdynynyń jetý qıyn ýchaskelerin zertteýge arnalǵan súńgýirlik jabdyqtar, eholottar, kater men qaıyq ta bar.
— Operatsııalarǵa qosymsha bes áskerı bólimniń kúsh-quraldary tartyldy. Jumys táýlik boıy jalǵasyp keledi. Іzdeý sharalary barysynda tikushaqtyń qaldyqtary tabyldy. Olardy anyqtaý jumystary júrgizilip jatyr. Operatsııa kúrdeli gıdrografııa jaǵdaıynda ótýde. Soǵan qaramastan, barlyq jumylǵan bólimsheler júktelgen mindetterdi barynsha dál jáne úılesimdi oryndaýdy jalǵastyrýda, — delingen habarlamada.
Qorǵanys mınıstrligi basqa memlekettik organdarmen birlesip izdeýdi aıaqtaý úshin barlyq múmkin sharalardy qoldanyp jatyr. Qosymsha aqparat jańa derekterdiń túsýine qaraı málimdenetin bolady.
Eske salsaq, 25 shildede Almaty oblysynda josparly ushý barysynda Qazaqstan Respýblıkasy Qarýly Kúshteri Áýe qorǵanysy kúshteriniń EC-145 tikushaǵy radardan joǵalyp ketti.
26 shildede TJM qutqarýshylary joǵalǵan tikushaqtyń bólshekterin tapty.
Josparly ushyp ótý kezinde joǵalǵan Áýe qorǵanysy kúshteriniń EC-145 tikushaǵynda bolǵan adamdardyń ornyn anyqtaý maqsatynda Sorbulaq sý qoımasy aýdanynda aýqymdy izdestirý-qutqarý operatsııasy táýlik boıy jáne kúsheıtilgen rejımde júrgizilip jatyr.