Tikushaq alańy da bar: Qoıandyda qutqarýshylardyń jańa bazasy ashyldy
ASTANA. KAZINFORM — Aqmola oblysynyń Qoıandy aýylynda tikushaq alańy bar jańa órt sóndirý deposy ashyldy. Bólimsheniń jumysyn Tótenshe jaǵdaılar mınıstri Murat Muhanov bastady, dep habarlaıdy TJM baspasóz qyzmeti.
Bul – órt sóndirýshiler men qutqarýshylarǵa arnalǵan zamanaýı bazany qurýdyń birinshi kezeńi. Nysan Qazaqstan qutqarýshylary qorynyń qarajaty esebinen tez qurastyrylatyn konstrýktsııalardan salynǵan.
Jańa órt sóndirý bólimi alty tehnıkaǵa arnalǵan jáne shamamen 30 myń adam turatyn segiz eldi mekendi qorǵaıdy.
Keshen aýmaǵynda tótenshe jaǵdaılar kezinde qutqarý avıatsııasyn tartýǵa arnalǵan tikushaq alańy ornalasqan.
Munda sýburqaqtary, kúrkesi, barbekıý alańy men jylqy músinderi bar demalys oryndary jabdyqtalǵan.
Ǵımaratta kezekshi qaraýyldarǵa arnalǵan bólmeler, oqý synyby, as úı, jatyn bólmeler jáne psıhologııalyq jeńildeý bólmesi qarastyrylǵan.
Jeke quramnyń táýlik boıy qyzmet atqarýyna, daıyndyq júrgizýine jáne demalýyna qajetti jaǵdaılar jasalǵan.
Saltanatty rásim barysynda TJM basshysy jańa deponyń jabdyqtalýymen jáne órt sóndirýshilerdiń qyzmet etý jaǵdaılarymen tanysty. Ashylý rásimi quttyqtaýlarmen, izgi tilektermen jáne vedomstvolyq nagradalardy tabystaýmen jalǵasty.
Nysannyń qurylysyna qosqan úlesi úshin jergilikti atqarýshy organdardyń ókilderi, kásipkerler, TJM qyzmetkerleri men aýyl turǵyndary marapattaldy.
Jańa órt sóndirý bóliminiń sımvolıkalyq kiltin mınıstr №33 órt sóndirý bóliminiń bastyǵy Sultan Takıshevke tabys etti.
Birinshi kezeń aıaqtalyp, jańa órt sóndirý bólimi óz mindetterin oryndaýǵa kirisedi. Alda kúndelikti kezekshilik, jattyǵýlar men shaqyrtýlarǵa shyǵý jumystary kútip tur. Qoıandy jáne kórshiles aýyldardyń turǵyndary úshin bul órt sóndirý bólimsheleriniń jaqyn ornalasyp, tótenshe jaǵdaılar kezinde kómektiń jyldamyraq jetetinin bildiredi. Deponyń ashylýy Tselınograd aýdanyndaǵy órtke qarsy qyzmetti damytýdyń jańa kezeńine jol ashty.
Osyǵan deıin elimizde 237 erikti órt sóndirý beketi salynǵanyn jazǵanbyz.
