TKSh komıteti Shahandaǵy jaǵdaı qaıtalanbaýy úshin derbes jylytý júıelerin tekserýdi usyndy
Komıtettiń málimetinshe ortalyq jylý berý júıesine Qazaqstandaǵy kóppáterli turǵyn úılerdiń (39 314 úı) 74 paıyzy qosylǵan.
«Kúzgi-qysqy mýsymda jylýdy paıdalanatyn qondyrǵylardyń iske qosylýy men olardyń tehnıkalyq jaǵdaıyn, sondaı-aq, jylý júıeleri men olardyń daıyndyǵy jáne jóndeý-qalpyna keltirý jumystaryn jergilikti atqarýshy organdar júzege asyrady», dep málim etti komıtet.
Barlyq qýattaǵy jumys isteıtin jylý qazandyqtary men jylý júıeleriniń kúzgi-qysqy jumysqa daıyndyq qujatyn berý, sondaı-aq, esepke qoıý jáne qaýipti tehnıkalyq qondyrǵyny esepten shyǵarý jergilikti atqarýshy organdardyń quzyryna jatady. Budan basqa, jergilikti atqarýshy organdar 0,07 megaPaskalden joǵary qysymdaǵy nemese sýdyń qyzýy 115 Tselsıı gradýstan asqan jaǵdaıda qaýipti tehnıkalyq qondyrǵynyń qaýipsiz jumys isteý barysyna baqylaý jasaıdy.
«Qaraǵandy oblysynda oryn alǵan qaıǵyly jaǵdaı qaıtalanbaýy úshin derbes jylytylatyn barlyq kóppáterli turǵyn úılerge tekserý júrgizý qajet dep sanaımyz», delingen habarlamada.
Úılerdi ortalyq jylýǵa qosý máselesi sáıkes bıýdjettik baǵdarlamalar arqyly, sondaı-aq, qyzmet kórsetýshilerdiń jeke esebi arqyly sheshiledi. Ortalyq jylýmen jabdyqtaýǵa ketetin shyǵyndar qolda bar sáıkes jylý qýaty jáne jylýmen jabdyqtaý júıesin esepke ala otyryp, jobalyq-smetalyq qujattama negizinde anyqtalady. Bıýdjetten TKSh jańǵyrtýǵa arnalǵan qarjy oblystar qajetti rásimdeýlerden ótken soń bólinedi. Jobalardy qarjylandyrý qajettigi ákimdikterdiń ótinishi men sheshimi negizinde anyqtalady.
2020 jylǵa deıingi óńirlerdi damytý baǵdarlamasy jáne 2015-2019 jyldarǵa arnalǵan «Nurly jol» ınfraqurylymdy damytýǵa arnalǵan memlekettik baǵdarlama negizgi respýblıkalyq bıýdjettik baǵdarlamalar bolyp tabylady.
2020 jylǵa deıingi óńirlerdi damytý baǵdarlamasy aıasynda:
2015 - 2016 jyldary kommýnaldyq salaǵa respýblıkalyq bıýdjetten buryn bastalǵan jobalardy aıaqtaý úshin 29 jobany júzege asyrýǵa 5,2 mlrd. teńge (jylýmen jabdyqtaýǵa -2948,4 mln. teńge somaǵa 11 joba, gazben jabdyqtaýǵa -2125,0 mln. teńge somaǵa 13 joba, elektrmen jabdyqtaýǵa -78,0 mln. teńge somaǵa 5 joba) bólindi.
Іs júzinde shamamen 402,4 shaqyrym ınjenerlik jeli salyndy jáne qaıta qalpyna keltirildi, onyń ishinde jylýmen jabdyqtaý - 31 shaqyrym, elektrmen jabdyqtaý - 61 shaqyrym, gazben jabdyqtaý - 310,4 shaqyrym jáne 100 Gkal/s-ǵa deıin 3 qazandyq.
«Nurly jol» baǵdarlamasy aıasynda 2015 jyly jylý-sýmen jabdyqtaý jáne sý tartý júıesin jańǵyrtý boıynsha 92 jobany júzege asyrýǵa 60 mlrd teńge bólingen. Aǵymdaǵy kezeńde 226,7 shaqyrym ınjenerlik júıe salyndy jáne qaıta qalpyna keltirildi. Onyń 165,8 shaqyrymy jylýmen jabdyqtaý júıesi; 60,9 shaqyrym y sýmen jabdyqtaý jáne sý tartý júıesi.
2016-2017 jyldary bólingen qarajatqa 1 716,7 shaqyrym ınjenerlik júıeni, onyń ishinde: 103,8 shaqyrym jylýmen jabdyqtaý júıesin; 1329 shaqyrym sýmen jabdyqtaý júıesin; 283,9 shaqyrym sý tartý júıesin salý jáne qalpyna keltirý josparlanyp otyr.
2017 jyly baǵdarlama aıasynda bıýdjettik nesıeleý tetigi arqyly jylý, sýmen jabdyqtaý jáne sý tartý júıesin jańǵyrtý boıynsha 80 jobany júzege asyrýǵa 48 mlrd teńge bólindi.
Shamamen 2 000 shaqyrym ınjenerlik júıe salynady jáne qalpyna keltiriledi, sondaı-aq, 2018 jyly jobany aıaqtaý merziminde júıelerdiń tozýy 57% azaıady jáne shamamen 1 025 707 abonentke kórsetiletin qyzmet sapasy jaqsarady.
