TQS qyzmetkeri klıenttiń qymbat kóligin minip ketti
ASTANA. 22 aqpan. QazAqparat - Tehnıkalyq qyzmet kórsetý ornynyń (STO) qyzmetkeri ıesine bildirmeı turaqtaǵy «Porsh Kaen» kóligin minip bara jatqan jerinen ustaldy.
Astana qalalyq ishki ister departamenti Jol polıtsııasy basqarmasynyń habarlaýynsha, oqıǵa keshe túngi 22-15-ter shamasynda bolǵan. Jol polıtsııasynyń qyzmetkerleri qyzmet barysynda Jumabaev kóshesinen Muńaıtpasov kóshesine qaraı apatty jaǵdaıdan habar beretin belgisin jaǵyp bara jatqan «Porsh Kaen» kóligin kórip, toqtaýǵa belgi beredi. Alaıda júrgizýshi eskertýdi elemegen soń, polıtsııa kóliktiń izine túsedi. Al «Porsh Kaenniń» júrgizýshisi jyldamdyqty arttyryp, qashýǵa árekettenedi. Jol-jónekeı ol tipti apatqa ushyrap qala jazdaıdy.
Polıtsııa qyzmetkerleri kólikti Jırentaev pen Petrov kósheleriniń qıylysynda toqtatady. Alaıda júrgizýshi kólikten shyǵyp jaıaý qasha jóneledi. Birer mınýttan soń ol qolǵa tústi. Tekserý sharasy kórsetkendeı, kúdikti 1986 jyly týylǵan P. atty azamat bolyp shyqty. Ol kólikti spırttik ishimdik iship alyp júrgizgen eken. Al kóligin ózge bireýdiń júrgizip júrgenin ıesi bilmeıtin bolyp shyqty. Ustalǵan azamattyń júrgizýshi kýáligi de joq. Onyń qaladaǵy kólikke qyzmet kórsetý oryndarynyń biriniń qyzmetkeri ekendigi anyqtaldy. Ol 10 táýlikke ákimshilik quqyq buzý áreketi boıynsha ustalǵandardy qamaıtyn orynǵa jetkizildi. Kúdikti osy áreketi boıynsha zań aldynda jaýap beretin bolady.
