Tikeleı kommýnaldyq tólem: Almatylyqtar ujymdyq kelisimsharttan bas tartyp jatyr

ALMATY. KAZINFORM — Almatylyqtar endi kommýnaldyq tólemdi birden qyzmet kórsetýshige tóleı alady. Bul týraly «Almaty sý» mekemesi habarlady.

Resmı málimetke sáıkes, sýmen jabdyqtaý úshin Páter ıeleri kooperatıvi (PIK) esepteý júrgizetin ujymdyq sharttardan kezeń-kezeńimen bas tartý jumystary bastaldy.

— Endi árbir úı ıesi óziniń jeke shotyn alyp, kórsetilgen qyzmet tólemderin qalalyq tarıf boıynsha deldaldarsyz qyzmet kórsetýshige tikeleı tóleı alatyn bolady. Bıyl qala boıynsha 60-tan astam ujymdyq sharttar buzylyp, 15 000-nan astam jeke sharttar jasaldy, — dep habarlady «Almaty sý».

Sondaı-aq mekeme «Aıgerim-1» jáne «Aıgerim-2» shaǵyn aýdandarynda jeke sharttar jasasý boıynsha jumystar bastalǵanyn habarlady.

— Burynǵy qyzmet kórsetýshi kooperatıv 70 mln teńgeden astam bereshek jınaǵandyqtan, onymen jasalǵan shart buzyldy. Jeliler qazir «Almaty Sý» mekesine tapsyryldy, — delingen málimdemede.

Eske salaıyq, turǵyndar sharttar jasasý máseleleri boıynsha Alataý aýdanynyń qyzmet kórsetý ortalyǵyna júgine alady — Almaty qalasy, Chýlanov kóshesi, 109.

Buǵan deıin 150 myń almatylyqty sýmen qamtamasyz etetin «Aqsaı» stantsııasy qarashada iske qosylatynyn jazǵanbyz.