Onlaın-toıdan salyq tólenýi kerek: Prodıýser tanymal ánshi áýletindegi toıdyń mán-jaıyn túsindirdi
ASTANA. KAZINFORM — Qarjy mınıstrligine qarasty Memlekettik kirister komıteti belgili ánshi Sáken Maıǵazıevtiń aqyly toı kórsetilimi týraly habarlamasyna pikir bildirdi.
Belgili bolǵandaı, Sáken Maıǵazıev óz ulynyń úılený toıyn kórgisi keletinderge jabyq telegram-kanal ashqan. Ol kanalǵa jazylý úshin 1380 teńge tóleý kerek. Bul qazaq qoǵamyndaǵy alǵashqy aqyly onlaın-toı bolmaq jáne jurtshylyq arasynda qyzý talqyǵa tústi. Bir jaǵynan dattaýshylar kóbeıse, ekinshi jaǵynan onlaın-toıǵa jazylýshylar sany artyp, qosymsha server ashýǵa týra kelgen.
Tabys salyǵyn tóleý mindetti
Komıtet Qazaqstan Respýblıkasynyń zańnamasyna sáıkes, salyq tóleýshiniń salyqtar men bıýdjetke mindetti tólemder boıynsha salyqtyq mindettemeleri onyń zańdy nysanyna, qoldanylatyn salyq salý rejımine jáne salyq salý obektileriniń bolýyna tikeleı baılanysty.
− Qarastyrylyp otyrǵan jaǵdaıda onlaın-toıǵa qatysý úshin 1380 teńge kóleminde aqy alý tabys tabýǵa baǵyttalǵan kásipkerlik qyzmet bolyp sanalady. Eger is-sharany uıymdastyrýshy jeke kásipker nemese zańdy tulǵa retinde tirkelse, alynǵan tabysty deklaratsııalap, qoldanylatyn salyq salý rejımine baılanysty jeke tabys salyǵyn tóleýge mindetti, − dep jazylǵan komıtettiń agenttikke bergen jaýabynda.
Zańǵa sáıkes, uıymdastyrýshy shaǵyn bıznes sýbektileri úshin jeńildetilgen deklaratsııa negizinde arnaıy salyq rejımi qoldanylǵan jaǵdaıda — 3%; jeke kásipker úshin jalpyǵa birdeı belgilengen salyq salý rejımi bolsa — 10%; zańdy tulǵa bolsa — 20% mólsherinde salyq tóleýi kerek.
Osyǵan uqsas salyq salý tártibi saltanatty is-sharalardy uıymdastyrý salasynda qyzmet kórsetetin sýbektilerge de qoldanylady. Bul sanatqa meıramhanalar men banket zaldary, sondaı-aq júrgizýshiler (asaba), ártister, mýzykalyq jáne bı ujymdary, is-sharalardy ótkizý sheńberinde qyzmet kórsetetin kásipkerler jatady.
Salyqqa toı ıeleriniń qatysy joq
Toıdy uıymdastyrýmen aınalysyp jatqan prodıýser Jan Muqanov salyq tóleý máselesiniń ádil ári ashyq ekenin aıtyp otyr. Barlyq salyqtyq mindettemeni uıymdastyrýshy kompanııasy óz moınyna alady.
− Bıletterdi satý, tabys esebi, býhgalterlik rásimder − bári zańdy túrde júrgiziledi jáne memlekettik kirister organdaryna tirkeledi. Toı ıeleriniń bul tabysqa qatysy joq, bul jobanyń uıymdastyrýshylyq deńgeıinde júzege asyp jatqan mádenı bastama. Sondyqtan, salyq ta kompanııa deńgeıinde tólenedi, − dedi Jan Muqanov.
1380 teńge qalaı bekitildi
Sonymen birge, prodıýser 1380 teńge baǵasy qalaı bekitilgenin, onlaın-toı jasaýǵa qandaı shyǵyndar ketetinin aıtyp berdi.
− 1380 teńge − kommertsııalyq tabys úshin emes, jobanyń tehnıkalyq shyǵyndaryn óteýge arnalǵan eń mınımaldy soma. Biz kásibı túsirilim, birneshe kamera, rejıssýra, jaryq, dybys, translıatsııa platformalary jáne montaj syndy úlken jumysty eskerdik. Osyǵan oraı, árbir kórermennen alynatyn qarajat jalpy bıýdjettiń tek az bóligin ǵana jabady, − deıdi Jan Muqanov agenttikke bergen suhbatynda.
Prodıýserdiń aıtýynsha, onlaın toı uıymdastyrý − óte kúrdeli, tehnıkalyq jáne shyǵarmashylyq jaǵynan aýqymdy protsess. Shyǵyndardyń negizgi bóligi kásibı túsirilim tobyna (rejısser, operatorlar, jaryq, dybys ınjenerleri), kópkameraly translıatsııa men rejıssýraǵa, sapaly ınternet pen arnaıy tehnıkalyq serverlerdi jalǵa alýǵa, tikeleı efır platformasy men qorǵaý júıelerine jáne mýzykalyq nómirler, arnaıy qoıylymdar sekildi shoý elementterine jumsalady.
Eske sala ketsek, budan bylaı ChatGPT de Qazaqstanda qosymsha qun salyǵyn tóleıtin boldy.