Tyıymǵa qaramaı tabaqtan tabyldy: Túrkııada shoshqa etine qatysty zańbuzýshylyqtar tirkeldi

ASTANA. KAZINFORM — Tyıymǵa qaramastan, Túrkııanyń birqatar provıntsııalarynda satylatyn ónimderge shoshqa eti qosylyp jatyr, dep habarlaıdy Kazinform agenttiginiń menshikti tilshisi.

Túrkııanyń Aýyl jáne orman sharýashylyǵy mınıstrligi eldiń túrli aımaqtarynda shoshqa etiniń taralýyna qatysty sońǵy tekseris nátıjelerin jarııalady. Jarııalanǵan tizimge sáıkes, shoshqa eti eń kóp satylatyn alty provıntsııa — Býrsa, Konıa, Antalıa, Mýgla, Balıkesır jáne Adananyń aty ataldy.

Mınıstrlik erekshe nazar aýdarǵan óńirler — dástúrli túrde konservatıvti kózqarastaǵy jáne dinı ustanymdary basym turǵyndary bar Býrsa men Konıa qalalary. Bul jerlerde shoshqa eti qosylǵan ónimderdiń kóptep tabylýy kútpegen jaǵdaı boldy.

Týrıster jıi keletin Antalıa men Mýglada shoshqa etine suranys sheteldik qonaqtar tarapynan bolǵanymen túsindiriledi. Alaıda mınıstrliktiń málimetinshe, keıbir mekemelerde kelýshilerge taǵam quramyna qatysty tolyq aqparat berilmeıdi, bul óz kezeginde shaǵymdardyń kóbeıýine sebep bolǵan.

Anyqtalǵan zań buzýshylyqtarǵa baılanysty Aýyl jáne orman sharýashylyǵy mınıstrligi qoǵamdyq tamaqtaný jáne saýda oryndaryna baqylaýdy kúsheıtip, ónim quramyn durys kórsetpegen kompanııalardyń tizimin jarııalady. Sondaı-aq azamattarǵa ónim japsyrmalaryn muqııat tekserýdiń mańyzdylyǵyn eskertilip jatyr.

Tekseris nátıjeleri men ereje buzǵan kásiporyndar týraly ózekti aqparatty mınıstrliktiń resmı saıtynan kórýge bolady: guvenilirgida.tarimorman.gov.tr.

Mınıstrlik tutynýshylardy qyraǵy bolýǵa jáne taǵam ónimderindegi jalǵan aqparatqa qatysty dereý habarlaýǵa shaqyrady.

Eske sala keteıik, buǵan deıin Túrkııa qonaqúılerdiń jappaı jabylýy týraly qaýesetti joqqa shyǵarǵanyn jazǵan edik.