Pavlodarlyq azamat tyıym salynǵan zatty tergeý ızolıatoryna kirgizbek bolǵan

ASTANA. KAZINFORM – Pavlodardaǵy tergeý ızolıatoryna sálemdeme ákelgen azamat taýyq etine eki telefon men úsh ınternet-roýter jasyryp ótkizbek bolǵan. Bul týraly Polisia.kz habarlady.

Pavlodar oblysy boıynsha QAJ departamentiniń №63 mekemesinde sálemdemelerdi qabyldaý kezinde rentgen qondyrǵysyn qoldaný arqyly paıdalanýǵa tyıym salynǵan zattar anyqtalyp, tárkilendi. Eki telefon, úsh roýter, sondaı-aq sım-kartalardy 44 jastaǵy pavlodarlyq ákelgen úsh grıl taýyqtyń ishine aılaly orap, jasyrǵan.

– Sálemdemeni densaýlyqqa aýyr zııan keltirgeni úshin jazasyn ótep jatqan 38 jastaǵy sottalǵan azamatqa tanysy alyp kirmek bolǵan. Tekseris kezinde tyıym salynǵan zattar tabylyp, tárkilendi, – deıdi №63 mekeme bastyǵy Berık Rahımov.

Tergeý ızolıatorynyń qyzmetkerleri sottalǵandarmen jáne olardyń týystarymen sálemdemelerdi jetkizý jáne mekemege barý kezinde tyıym salynǵan zattardy alyp júrýge jol bermeý týraly júıeli túrde áńgimelesý júrgizedi. Degenmen kelýshiler zań aldynda jaýapkershilikke ákep soǵatyn mundaı quqyq buzýshylyqtardy doǵarmaı otyr. Er adamǵa qatysty ákimshilik hattama toltyryldy. Materıaldar sotqa jiberildi.