Tyıym salynǵan kontent oqýshylarǵa qoljetimdi bolǵan: Abaı oblysynda mektep dırektorlary jaýapqa tartyldy
ASTANA.KAZINFORM - Abaı oblysynda prokýratýra balalardy zııandy ınternet-kontentten qorǵady.
Úrjar aýdanynyń prokýratýrasy jalpy bilim berý uıymdarynda Qazaqstan Respýblıkasynyń «Bilim týraly» Zańynyń 43-baby talaptarynyń saqtalýyna tekserý júrgizdi.
Belgilengen talaptarǵa qaramastan, 8 mektepte balalardyń ómiri men densaýlyǵyna qaýip tóndiretin tyıym salynǵan saıttarǵa (onyń ishinde sýıtsıdtik, zorlyq-zombylyq sıpatyndaǵy jáne eresekterge arnalǵan kontentterge) erkin qoljetimdilik bolǵany anyqtaldy.
Prokýrorlyq qadaǵalaý aktisi boıynsha mektep dırektorlary Qazaqstan Respýblıkasynyń Ákimshilik quqyq buzýshylyq týraly kodeksiniń 409-baby 7-2-bóligi boıynsha ákimshilik jaýapqa tartylyp, aıyppul salyndy.
Sonymen qatar atalǵan barlyq bilim berý uıymdarynda tyıym salynǵan ınternet-resýrstarǵa qoljetimdilik shekteldi. Qabyldanǵan sharalar nátıjesinde 1609 myńnan astam balanyń quqyǵy qorǵaldy.
Prokýratýra eskertedi: kámeletke tolmaǵandardyń quqyqtary men zańdy múddeleri buzylǵan jaǵdaıda, zańdy ókilder nemese balalar oblys prokýratýrasynyń senim telefonyna: 8 (7222) 60-07-50 habarlasa alady.
Aıta keteıik, Qazaqstanda fılmder prokatqa shyǵar aldynda pornografııa men tyıym salynǵan kontentke tekseriledi.
