Tıtýldy jekpe-jek: Boksshy Nursultan Jańabaev jeńiske jetti

MÁSKEÝ. QazAqparat - Qazaqstandyq Nursultan Jańabaev Máskeýdegi boks keshinde WBC ASIA tıtýly úshin birinshi orta salmaqta fılıppındik Arnel Tınampaımen kezdesti, dep habarlaıdy QazAqparat tilshisi.

Atyraýlyq jas boksshy Nursultan buǵan deıin kásibı boksta bes kezdesý ótkizse, sonyń tórteýin nokaýtpen aıaqtaǵan bolatyn. Onyń qarsylasy A.Tınampaı (25-22-1, 11 KO) talaıdy kórgen tájirıbeli boksshy edi.

On raýndqa sozylǵan asa tartysty básekede boksshylar bir-birine berispeı, baryn saldy. Ásirese, besinshi raýndta Nursultannyń soqqylary kóbirek dóp tıdi. Degenmen kezdesý barysynda onyń fılıppındik qarsylasy da alǵa umtylyp baqty.

Tóreshilerdiń biraýyzdan sheshimimen jeńis N.Jańabaevqa berildi. Osylaısha ol Máskeý tórinde WBCASIA tıtýlyn jeńip aldy.

Eske sala keteıik, budan buryn Aıdos Erbosynulynyń WBO GLOBAL tıtýlyn jeńip alǵanyn jazǵan bolatynbyz.