«Tıtanıkte» qaza tapqan jolaýshynyń saǵaty aýktsıonda 2,3 mln dollarǵa satyldy

ASTANA. KAZINFORM — Macy’s ámbebap dúkender jelisiniń teń ıesi Isıdor Shtraýs áıeli Ida Shtraýspen birge «Tıtanıkte» saıahattaǵan. Keme Atlant muhıtynda batyp bara jatqan kezde olardy palýbada qol ustasqan kúıde kórgender bolǵan, dep habarlaıdy DW.

Kýágerlerdiń aıtýynsha, 67 jastaǵy Isıdor qaıyqqa otyrýdan bas tartqan, óıtkeni bárine birdeı jetkilikti oryn bolmaǵan. Al Ida kúıeýiniń janynda qalýdy sheshken.

Olardyń oqıǵasy Djeıms Kemeronnyń «Tıtanık» fılmindegi áıgili kóriniske negiz bolǵan: keme batyp jatqanda qart jup tósekte qushaqtasyp jatady.

Shtraýstyń denesi shamamen eki aptadan keıin teńizden tabylǵan, al Idanyń súıegi sol boıy tabylmaǵan.

Isıdor Shtraýstyń altynnan jasalǵan qalta saǵaty 1912 jylǵy 15 sáýirde túngi 2:20-da toqtap qalǵan. Saǵattyń syrtynda onyń aty-jóniniń alǵashqy áripteri men 43 jasqa tolǵan kúni jazylǵan. Bul týraly brıtandyq Henry Aldridge & Son aýktsıon úıi habarlady.

Aýktsıonda Ida Shtraýstyń mıssıs Berbrıdjge «Tıtanıktiń» fırmalyq qaǵazyna jazǵan haty da satyldy.

— Tamasha keme! Óte úlken ári keremet jabdyqtalǵan. Bólmelerimiz asa talǵampazdyqpen bezendirilgen, ǵajaıyp sándi — bul shynymen de naǵyz lıýks nómirler, — dep jazdy Ida.

Áıeldiń haty 131 myń dollarǵa satyldy.

2023 jyly Atlant muhıtynda «Tıtanıkti» kórý barysynda kezinde apatqa ushyraǵan «Tıtan» batıskafyna qatysty oqıǵa da Shtraýs áýletimen janama túrde baılanysy bar. Batıskaftyń jasaýshysy Stokton Rashtyń jary — Isıdor men Ida Shtraýstyń shóberesi.

Budan buryn Polkovnık Archıbalda Greısıdiń «Tıtanık» kemesi sýǵa batqanǵa deıin birneshe kún buryn jazǵan haty Ulybrıanııadaǵy aýktsıonda £300 000 ($400 000) satylǵany anyqtaldy.