"Tıtanık" jolaýshysynyń haty aýktsıonda rekordtyq baǵaǵa satyldy
ASTANA. Sáýirdiń 19-y. QazAqparat /Aıgúl Aıtmuqanova/ - "Tıtanık" jolaýshysy Adolf Saafıldtiń áıeline jazǵan haty jeksenbi kúni Ulybrıtanııadaǵy aýktsıonda 55 myń fýnt sterlıngke ($84,72 myń) satyldy,
dep habarlady RIA "Novostı" agenttigi.
Basylymda atalǵandaı, bul soma «Tıtanıkten» jiberilgen hatqa tólengen rekordtyq qarjy kólemi. «Tıtanıkti» jasaýshy men onyń operatory White Star Line kompanııasyna baılanysty ózge 350 lottyń ishinde saýdaǵa qoıylǵan Saafıld hatyn esimi atalmaǵan brıtan murajaıy satyp aldy.
Aýktsıon úıiniń ókili Endrıý Eldrıdj sózine qaraǵanda, birinshi klass jolaýshysy Saafıldtiń áıgili keme sýǵa keterden 5 kún buryn áıeline jazǵan haty - asa qundy qujat. "Ony oqyǵan adam bólmeniń ólshemi, bezendirilýi, beriletin tamaq sııaqty jaıttardy bilip, kemedegi tynys-tirshilik jaıly búge-shúgesine deıin birinshi klass jolaýshysynyń kózimen kórýge múmkindik alady, - dep málimdedi Eldrıdj.
