«Tıtanık» jolaýshysynyń haty aýktsıonda 12 myń dollarǵa satyldy
BÝENOS-AIRES. TASS – QazAqparat - «Tıtanık» jolaýshysynyń laıner bortynda jazylǵan haty Ýrýgvaıdaǵy aýktsıonda 12 myń dollarǵa satyldy, dep habarlaıdy QazAqparat TASS-qa silteme jasap.
EFE agenttigi juma kúni málim etkendeı, 1912 jyly 11 sáýirde jazylǵan hatty aǵasyna ýrýgvaılyq Ramon Artagaveıtııa Gomes jazǵan. Bul hat «Tıtanıktiń» sońǵy aıaldamasy – Irlandııadan joldanǵan. Budan ári laıner Atlant muhıtynan ótýge attanyp, apatqa usharady. Zorilla aýktsıon úıiniń saıtynda jazylǵandaı, keıin Artagaveıtııa Gomestiń aǵasy hattyń bir betine bylaı dep jazyp qoıǵan: «Meniń súıikti aǵam Ramonnyń maǵan jazǵan sońǵy haty. Úsh kúnnen keıin «Tıtanık» apatqa ushyrady, ol sýǵa batyp ketti«.
Infobae ınternet-portalynyń habarlaýynsha, lot bastapqy baǵasyna satyldy. Satyp alýshynyń aty-jóni jarııalanǵan joq.
«Tıtanık» 1912 jylǵy sáýirdiń 14-inen 15-ine qaraǵan túni aısbergpen soqtyǵysyp, sýǵa ketti. Ulybrıtanııanyń Saýtgempton qalasynan Nıý-Iorkke deıingi alǵashqy reısine shyqqan kemede barlyǵy 2224 adam boldy, olardyń 1513-i qaza boldy. Keme synyqtary 1985 jyly Kanadanyń Nıýfaýndlend jaǵalaýynan 600 km qashyqtyqta 3,8 km tereńdikte tabyldy.
