«Tıtanık» jolaýshysyna tıesili qutqarý jıleti 906 myń dollarǵa satyldy
ASTANA. KAZINFORM – «Tıtanık» kemesi apatynan aman qalǵan jolaýshy Lora Meıbl Frankatellıge tıesili qutqarý jıleti aýktsıonda kollektsıonerge 670 myń fýnt sterlıngke satyldy, dep habarlaıdy BBC.
Keme apatynan beri ótken 114 jyl ishinde bul «Tıtanıkten» qalǵan qutqarý jıletiniń alǵash ret ashyq saýdaǵa shyǵarylyp satylýy bolyp otyr. Lot Ýıltshır graftyǵyndaǵy Devaızes qalasynda ornalasqan Henry Aldridge & Son aýktsıon úıi arqyly usynyldy.
Frankatellı birinshi klasta sapar shekken jáne 1912 jylǵy apattan aman qalǵan shamamen 700 adamnyń biri bolǵan. Ol qutqarý qaıyǵyna otyrmas buryn osy jıletti kıgen. Jılette 12 qalta bar, ıyq tirekteri men búıir beldikterimen jabdyqtalǵan. Onda Frankatellı men basqa da aman qalǵandardyń qoltańbalary saqtalǵan.
Aýktsıonshy Endrıý Oldrıdj bul oqıǵaǵa erekshe qýanyshty ekenin jasyrmady.
– Bul «Tıtanık» tarıhyna, onyń jolaýshylary men ekıpajyna degen adamdardyń sarqylmas qyzyǵýshylyǵy men shynaıy súıispenshiligin kórsetedi, – dedi ol.
Buǵan deıin ol bul jıletti «114 jyl ishinde aýktsıonǵa qoıylǵan osyndaı jalǵyz buıym, ıaǵnı kollektsıonerler úshin shyn máninde biregeı múmkindik» dep ataǵan.
Satylymnyń sońǵy baǵasy boljamnan áldeqaıda joǵary boldy: sarapshylar lotty 250–350 myń fýnt sterlıng aralyǵynda baǵalaǵan.
Sol aýktsıonda «Tıtanıktiń» qutqarý qaıyqtarynyń birindegi oryndyq jastyǵy da 390 myń fýntqa satyldy. Onyń tarıhy Soltústik Atlantıkada aısbergpen soqtyǵysqan kezde qaza tapqan londondyq shaı saýdageri Rıchard Ýılıam Smıtpen baılanystyrylady. Ol Brýklınge áriptesi T. Dj. Metıýzben kezdesý úshin bara jatqan. Smıt apatta qaza tapqan 1500 adamnyń qatarynda boldy, alaıda onyń denesi tabylyp, resmı túrde anyqtalmaǵan.
Jastyqty AQSh-tyń Tennessı shtatyndaǵy Pıdjen-Fordj jáne Mıssýrı shtatyndaǵy Branson qalalarynda ornalasqan «Tıtanık» mýzeıi satyp aldy. Jaqyn arada bul jádiger turaqty ekspozıtsııaǵa qoıylady.
Aýktsıon Saýtgempton qalasynda 14 sáýir kúni laıner apatynyń 114 jyldyǵyna arnalǵan memorıal janynda ótken aza tutý rásiminen keıin kóp uzamaı uıymdastyryldy.
Aıta keteıik, bıyl aqpan aıynda «Tıtanık» kemesiniń sońǵy tiri qalǵan jolaýshysy Mılvına Dın ómirden ozdy.
Al byltyr qarasha aıynda «Tıtanıkte» qaza tapqan jolaýshynyń saǵaty aýktsıonda 2,3 mln dollarǵa satyldy.
Sondaı-aq «Tıtanık» kemesinde aman qalǵan jolaýshynyń haty 300 000 fýnt sterlıngke satylǵanyn jazdyq.
