«Tıtanık» pen «Karıb teńiziniń qaraqshylary» fılmderiniń arnaıy effektilerin jasaǵan kompanııa bankrot boldy
ASTANA. 12 qyrkúıek. QazAqparat - Digital Domain Media Group dep atalatyn Digital Domain stýdııasynyń enshiles kompanııasy bankrottyq týraly amerıkandyq kodekstiń 11 baby boıynsha sotqa óziniń ótinishin berdi. Bul týraly Reuters-ke silteme jasap, Lenta.rý saıty jazady.
Ataqty «Tıtanıktiń» arnaıy effektilerin jasaǵan kompaııanyń qaryzy 215 mln. dollardan asyp túsken. Al aktıvteriniń quny 205 mln. dollar. 11 bap boıynsha bankrottyq kompanııany qaıta qurýdy qarastyrady. Digital Domain óz jumysyn jalǵastyryp, 120 kún ishinde sotqa qaıta qurýdyń josparyn ótkizýi tıis.
Digital Domain Sent-Lıýsı portyndaǵy (Florıda shtaty) anımatsııalyq bólimin jabýdy uıǵardy. Sondaı-aq, qyzmetshileriniń kóp bóligin, 320 adamdy jumystan shyǵardy. Legend 3D stýdııasy Digital Domain-nan shaǵarylǵan jumysshylardyń barlyǵyn ózine alatyndyǵyn habarlap ta úlgerdi.
DDMG-nyń aktsııalary bıylǵy mamyrda óz shyńyna shyǵyp, quny 9 dollarǵa jetken bolatyn. Al 11 qyrkúıekte baǵaly qaǵazdar 0,5 dollarmen satyldy.
Digital Domain-niń negizin qalaǵandardyń biri áıgili rejısser Djeıms Kemeron. Stýdııa kezinde «Tıtanık», «Karıb teńiziniń qaraqshylary: jerdiń shetinde», «Transformerler», «Bendjamın Battonnyń qupııa oqıǵasy», «Iks adamdar: Birinshi sanat» atty fılmderdiń arnaıy effektilerin jasaǵan bolatyn.
