Tıtanık mańynda joǵalǵan súńgýir qaıyq: Muhıt túbinen beımálim qırandylar tabyldy

ASTANA. QazAqparat - Soltústik Atlant muhıtynda joǵalyp ketken «Tıtan» súńgýir qaıyǵyn izdestirý aımaǵynan áldebir júzý quralynyń jaryqshaqtary men synyqtary tabyldy, dep habarlaıdy QazAqparat BBC agenttigine silteme jasap.

Atalmysh habardy AQSh jaǵalaý kúzeti taratqan. Alaıda bul synyqtar «Tıtan» batıskafyna tıesili me, joq pa - belgisiz.

Qırandylar jatqan qoqys alańyn joǵalǵan súńgýir kemeni izdep júrgen qashyqtan basqarylatyn apparat taýyp aldy.

CNN habarlaýynsha, qazir sarapshylar alynǵan aqparatty baǵalap jatyr.

Jaǵalaý kúzeti az ýaqyttan keıin Bostonda arnaıy brıfıng ótkizip, jaǵdaıdyń egjeı-tegjeıin aıtyp beremiz dep ýáde berdi.

Eske sala keteıik, jeksenbiden beri qutqarýshylar Atlant muhıtynyń soltústik bóliginde joǵalyp ketken súńgýir qaıyqty izdep jatyr.

Bortynda 5 adam (Frantsııa, AQSh, Ulybrıtanııa jáne Pákistan azamattary) bar shaǵyn «Tıtan» (Titan Sub) qaıyǵy Soltústik Atlantıkadaǵy sýǵa batqan «Tıtanık» kemesimen tanysý úshin 4 myń metr tereńdikke súńgip ketken.

Titan Sub – OceanGate kompanııasyna tıesili shaǵyn sýasty apparaty. Salmaǵy – 10 tonna, uzyndyǵy – 6,7 metr.

Syıymdylyǵy bes adammen shekteletin apparat 96 saǵatqa tereńge boılaı alady.

Qazir Amerıkanyń qarýly kúshteri Kanada men Frantsııadan kelgen áriptesteriniń qoldaýymen qutqarý operatsııasyna qatysyp jatyr.