Tıtanık mańynda qaza tapqan jas jigit muhıt túbinde álemdik rekord ornatqysy kelgen
LONDON. QazAqparat - «Tıtan» batıskafynyń qaza tapqan bes jolaýshysynyń biri, 19 jastaǵy Súleıman Davýd ózimen birge Rýbık tekshesin alyp, muhıt túbinde álemdik rekord ornatqysy kelgen. Bul týraly VVS agenttigine bergen suhbatynda onyń anasy aıtty, dep jazady QazAqparat.
Batıskaf muhıt túbine súńgimes buryn Súleıman Gınnestiń rekordtar kitabyna ótinish berdi, al onyń ákesi Shahzada Davýd balasynyń rekordyn túsirý úshin vıdeokamera ala shyqqan.
Krıstın Davýd pen onyń qyzy Alına «Tıtanmen» baılanys joǵalǵanyn estigen kezde súńgýir qaıyqty muhıt túbine attandyrý úshin paıdalanylǵan Polar Prince zertteý kemesiniń bortynda bolatyn.
«Sol sátte bul aqparatty qabyldaı almaı, bul neni bildiretinin túsinbedim, sodan keıin men úshin dúnıeniń bári aınalyp ketti», - dedi ol alǵashqy suhbatynda.
Aıtýynsha, kúıeýimen birge «Tıtanıkti» tamashalaımyn dep josparlaǵan, biraq sapary koronavırýs pandemııasyna baılanysty toqtatyldy.
Sodan keıin ol bul ıdeıadan bas tartyp, ulyna ekspedıtsııaǵa qatysýǵa múmkindik berýdi sheshti.
Krıstın Davýdtyń aıtýynsha, uly spıdkýbıngpen aınalysyp, Rýbık tekshesin ózimen birge barlyq jerde alyp júrgen.
Ol Súleımannyń kópshilikti teksheni 12 sekýndta jınaý qabiletimen tańqaldyrǵanyn aıtty.
Onyń aıtýynsha, Súleıman Rýbık tekshesin 3700 metr tereńdikte, «Tıtanık» kemesiniń janynda jınaǵysy kelgen.
Súleıman Glazgodaǵy Stratklaıd ýnıversıtetiniń stýdenti bolatyn.
Eske sala keteıik, bir apta buryn «Tıtan» batıskafy Tıtanık kemesiniń muhıt túbinde, 3,7 km tereńdikte jatqan qańqasyn kórý úshin sý astyna tústi.
Shamamen 1 saǵat 45 mınýttan keıin súńgýir qaıyqpen baılanys úzildi.
Aýqymdy izdestirý-qutqarý operatsııasy Nıýfaýndlend (Kanada) jaǵalaýynda jergilikti ýaqyt boıynsha 17:40 shamasynda, «Tıtan» sý betine shyǵýy tıis bolǵannan keıin shamamen úsh saǵat ótken soń bastaldy.
AQSh jaǵalaý kúzeti Soltústik Atlant muhıtynda joǵalyp ketken «Tıtan» súńgýir qaıyǵyn izdestirý aımaǵynan áldebir júzý quralynyń jaryqshaqtary men synyqtary tabylǵanyn habarlady.
Bortta bolǵan bes adam da qaza tapqan.
Sarapshylar «Tıtan» batıskafynyń qıraýyna ne sebep bolǵanyna óz boljamyn aıtty.
