«Tıtanık» laıneriniń apatqa ushyraýymen baılanysty 200 myńnan astam qujat Internette jarııalandy
ASTANA. 10 sáýir. QazAqparat - Ańyzǵa aınalǵan «Tıtanıktiń» apatqa ushyraýymen baılanysty 200-den astam qujat keshe Internette jarııalandy, dep habarlady ITAR-TASS.
Brıtandyq buqaralyq aqparat quraldarynyń habarlaýynsha, ınternet-jarııalanym osy aptada atalyp ótetin laınerdiń apatqa ushyraýynyń 100 jyldyǵyna arnalyp otyr.
Brıtandyq "Ensestrı" saıtyna «Tıtanıktiń» tarıhy jóninde kóptegen materıaldar jınalǵan. Olardyń ishinde qaza bolǵandardyń tizimi men apattan qutqarylǵandar týraly málimetter bar. Portalǵa kirýshiler keme kapıtany Edvard Smıttiń, sondaı-aq amerıkandyq magnattar Bendjamın Gýggenhaım men Djon Djeıkob Astordyń ósıetteri mátinimen tanysa alady. Olardyń úsheýi de 1,5 myńnan astam jolaýshylarmen birge sol qaıǵyly 1912 jylǵy sáýirdiń 14-inen 15-ine qaraǵan túnde qaza bolǵan edi.
Sonymen qatar saıtta «Tıtanıktiń» 121 jolaýshysy beıitiniń basyna qoıylǵan qulpytastardyń fotosýretteri, 300-den astam sot-medıtsınalyq qujattar jáne apattan keıin muhıttan tabylǵan deneler týraly 330 faıl ornalastyrylǵan. Arnaıy bólimde ashyq teńizdegi qaıyqshalarda qalǵan 700-ge jýyq adamdy qutqarǵan «Karpatııa» kemesi jolaýshylarynyń sýretteri bar.
269 metrlik «Tıtanık» 1911 jyly 31 mamyrda Belfastyda sýǵa túsirilgen álemdegi eń úlken keme bolatyn. Laıner tolyq jabdyqtalǵannan keıin 1912 jyly 10 sáýirde aǵylshyndyq Saýtgempton aılaǵynan Nıý-ıorkke bet aldy. Tórt kúnnen keıin laıner soltústik Atlantıkada muztaýǵa soqtyǵysyp, apatqa ushyrady. Onyń 2224 jolaýshysy men ekıpaj músheleriniń 1,5 myńnan astamy qazaǵa ushyrady. Keme qaldyqtary muhıt túbinde 3,8 shaqyrym tereńdikte jatyr.
Saıttaǵy muraǵatty 31 mamyrǵa deıin tegin kórýge bolady.
