«Tıtanık» kemesiniń jádigerlikteri AQSh-taǵy aýktsıonǵa qoıyldy
ASTANA. 29 aqpan. QazAqparat - Eki hat jáne ótken ǵasyrdyń basynda apatqa ushyraǵan «Tıtanık» kemesiniń basqa da jádigerlikteri osy aptada AQSh-taǵy aýktsıonda satylatyn bolady.
Bul týraly jergilikti BAQ-qa silteme jasaǵan Ýtro.rý habarlaıdy.
Jýrnalısterdiń málimetterinshe, ekinshi jáne úshinshi klasty jolaýshylarǵa qyzmet etip, keme apaty saldarynan qaza tapqan «Tıtanıktiń» kishi hırýrgy Djon Edvard Sımpsonnyń óz qolymen jazǵan haty aýktsıonnyń baǵaly lottarynyń birine aınalady.
Sımpsonnyń anasyna arnaǵan jáne apatqa deıin úsh kún qalǵanda jiberilgen haty 40-50 myń AQSh dollaryna baǵalanady.
Sondaı-aq aýktsıon lottarynyń arasynda áıgili kemeniń apatqa ushyraýymen baılanysty tórt radıogramma bar. Sarapshylardyń baǵalaýynsha, bul radıogrammalardyń árqaısysy aýktsıon uıymdastyrýshylaryna 3 myńnan 6 myń AQSh dollaryna deıin tabys bere alady.
