«Tıtan» batıskafy synyqtary arasynan, boljam boıynsha, adam súıekteri tabyldy
LONDON. QazAqparat – AQSh-jaǵalaý kúzeti «Tıtan» batıskafy qaldyqtarynyń arasynan, boljam boıynsha, adam súıekteri tabylǵanyn málimdedi, dep habarlaıdy QazAqparat VVS-ge silteme jasap.
«Tıtanıkke tereń súńgigen kezde jarylyp ketken súńgýir qaıyq qaldyqtary sársenbi, 28 maýsymda Kanadanyń Sent-Djons portyna shyǵaryldy.
AQSh medıtsına qyzmetkerleri adam qaldyqtaryna resmı taldaý jasaıdy, delingen jaǵalaý kúzetiniń málimdemesinde.
AQSh jaǵalaý kúzetiniń teńiz oqıǵalaryn tergeý komıssııasy (MBI) dálelderdi ary qaraı taldap, zertteý úshin amerıkalyq portqa jetkizedi.
MBI tóraǵasy, kapıtan Djeıson Noıbaýer «Tıtannyń» apatqa ushyraýyna sebep bolǵan faktorlardy anyqtap, mundaı qaıǵyly oqıǵa qaıtalanbas úshin áli aýqymdy jumys atqarýymyz kerek» dep atap ótti. Sonymen qatar, ol ekstremal teńiz tereńindegi derekterdi saqtap, qalpyna keltirýge kómektesken seriktesteriniń úılesken halyqaralyq jáne vedomstvoaralyq qoldaýyna alǵys aıtty.
Batıskaf 18 maýsymda sý astyna súńgip ketkennen keıin 90 mınýttan soń jarylyp, borttaǵy bes adam da mert boldy.
Bortta 58 jastaǵy brıtan kásipkeri jáne zertteýshi Hemısh Hardıng, 48 jastaǵy pákistandyq kásipker Shahzada Davýd pen onyń 19 jastaǵy uly Sýleıman, OceanGate kompanııasynyń dırektory 61 jastaǵy Stokton Rash, sonymen qatar 77 jastaǵy frantsýz zertteýshisi Pol-Anrı Narjole boldy.
Áýelde resmı tulǵalar máıittiń tabylýy múmkin ekenine senbedi.
Kemeniń joǵalyp ketkeni rastalǵannan keıin kóp uzamaı AQSh jaǵalaý kúzetiniń kontr-admıraly Djon Moger «Bul múmkin emes, teńiz túbi qaýipti» dedi.
Sol kezde kapıtan Noıbaýer tergeýshiler «adam qaldyqtaryn tapsa barlyq saqtyq sharalaryn» saqtaıtynyn jáne tergeýde kýágerlermen resmı tyńdalym bolatynyn aıtty.
Jaǵalaý kúzetiniń sózinshe, qazirgi ýaqytta súńgýir qaıyqtyń negizgi bes bóligi Tıtanıktiń tumsyq bóligindegi qaldyqtar jatqan alańnan tabyldy.
Qutqarý mıssııasyn Horizon Arctic kanadalyq kemesi basqardy, bortynda qashyqtan basqarylatyn Pelagic Research Services apparaty boldy. Sársenbi kúni kompanııa komanda teńiz operatsııalaryn aıaqtap, bazaǵa qaıtyp kele jatqanyn habarlaǵan bolatyn.
Eske sala keteıik, 18 maýsymda «Tıtan» batıskafy Tıtanık kemesiniń muhıt túbinde 3,7 km tereńdikte jatqan qańqasyn kórý úshin sý astyna tústi.
Shamamen 1 saǵat 45 mınýttan keıin súńgýir qaıyqpen baılanys úzildi.
Aýqymdy izdestirý-qutqarý operatsııasy Nıýfaýndlend (Kanada) jaǵalaýynda jergilikti ýaqyt boıynsha 17:40 shamasynda, «Tıtan» sý betine shyǵýy tıis ýaqyttan keıin shamamen úsh saǵat ótkende bastaldy.
AQSh jaǵalaý kúzeti Soltústik Atlant muhıtynda joǵalyp ketken «Tıtan» súńgýir qaıyǵyn izdestirý aımaǵynan áldebir júzý quralynyń jaryqshaqtary men synyqtary tabylǵanyn habarlady.
Bortta bolǵan bes adam da qaza tapqan.
Sarapshylar «Tıtan» batıskafynyń qıraýyna ne sebep bolǵanyna óz boljamyn aıtty.
