Tıisti qyzmetterdiń jer silkinisi kezindegi áreketter josparyna túzetý engiziledi
ASTANA. KAZINFORM – Seısmıkalyq qaýip bar aımaqtarda azamattyq qorǵanys qyzmetteriniń jumysy kúsheıtilgen rejımge kóshiriledi. Úkimet otyrysynda Premer-Mınıstr Álıhan Smaıylov osyndaı tapsyrma berdi.
«Óńir ákimdikteri múddeli memlekettik organdarmen birlesip osyndaı tótenshe jaǵdaılardyń aldyn alý jáne saldaryn joıý baǵytyndaǵy áreketter josparyna túzetý engizsin.
Azamattyq qorǵanys basqarmalary men kúshteriniń basshylaryna, jaýapty tulǵalarǵa basqarý beketterinde jedel áreket etý maqsatymen ýaqytsha kezekshilik júrgizý kerek. Bul ómirdi qamtamasyz etýge jaýapty uıymdardyń bárine qatysty. Ol úshin seısmıkalyq qaýip bar óńirlerde azamattyq qorǵanys júıesin kúsheıtilgen daıyndyqqa aýystyrý qajet. Densaýlyq saqtaý mınıstrligi men Almaty ákimdigi zardap shekkenderdi qajetti emmen qamtamasyz etýi kerek», — dedi Premer-Mınıstr.
Úkimet basshysy seısmıkalyq ahýaldy udaıy baqylaýda ustaý úshin kórshi eldermen birlesip áreket etýdi tapsyrdy.
«TJM qyzmetteri ahýaldy baqylaýda ustasyn. Qajetti qyzmetterdiń, onyń ishinde jer silkinisiniń epıtsentri bolǵan kórshiles elderdiń qyzmetterimen de ózara úılesimdi áreketin jolǵa qoıý qajet», — dedi Álıhan Smaıylov.
Eske salaıyq, búgin, qańtardyń 23-inen 24-ine qaraǵan túni Almatyda birneshe tolqynmen jer silkindi.
Resmı málimet boıynsha alǵashqy dúmpýdiń amplıtýdasy 5 balǵa deıin jetken. Saldarynan úreı boı aldyrǵan turǵyndardyń bir bóligi qalany tastap shyǵýǵa bekingen. Munyń arty kólik keptelisine ulasyp, janarmaı beketterinde kezek paıda bolǵan.
Halyq arasyndaǵy baıbalamdy paıdalanyp taksı baǵasyn birneshe ese kóterip jiberý faktileri de tirkeldi.
Epıtsentri Almatydan ońtústik-shyǵysqa qaraı 264 shaqyrym jerde, Qyrǵyzstan men Qytaı shekarasynda ornalasqan túngi jer silkinisi Almaty men Shymkentten bólek, Astanada jáne Qazaqstannyń bes oblysynda sezilgen.
Jer silkinisi kezinde Almaty qalasynda 8 adam zardap shekti, bir turǵynyń jaǵdaıy aýyr. Jaraqat alǵan úsh adam turǵyn úılerdiń 2 jáne 3 qabatynan sekirgen.
24-25 qańtar kúnderi Prezıdent Qasym-Jomart Toqaev Almatyǵa barady.
Ulttyq seısmologııalyq baqylaýlar men zertteýler ǵylymı ortalyǵynyń dırektory Dáýlet Sársenbaev Almatyda jaqyn ýaqytta joıqyn jer silkinisi bolmaıdy.
