Tis qaqqan ury Pavlodar-Astana poıyzynyń jolserigi men basshysyn tonap ketti
ASTANA. QazAqparat - Kólik polıtsııasy Pavlodar-Astana baǵytyndaǵy jolaýshylar poıyzynda úsh adamdy tonaǵan Pavlodar oblysynyń 22 jastaǵy turǵynyn ustady, dep habarlaıdy QazAqparat tilshisi kólik ІІD baspasóz qyzmetine silteme jasap.
Poıyz 14 qańtar kúni 22:40-ta Pavlodar stantsııasynan shyqqan jáne 01:20-da Ekibastuzǵa kelgen.
Sapar barysynda kólik ІІD jolaýshylar poıyzyn alyp júrý batalonynyń qyzmetkerlerine joǵaryda atalǵan poıyz basshysy habarlasyp, qyzmettik kýpeden 8600 teńge aqsha urlaǵan belgisiz adamǵa qatysty shara qabyldaýdy surady. Keıinirek kólik polıtsııasyna poıyz jolserikteriniń biri belgisiz bireýdiń 7600 teńge kóleminde qarajatyn jymqyryp ketkenin aıtyp shaǵymdanǵan.
Odan keıin poıyz vagondarynyń birinde jolaýshy quny 200 000 teńge turatyn uıaly telefonynyń urlanǵanyn habarlady.
Jedel-izdestirý sharalary aıasynda kólik polıtseıleri Pavlodar oblysynyń turǵynyn anyqtap, qolǵa túsirdi. Kúdikti taǵylǵan aıypty moıyndap, túsinikteme jazdy. Urlanǵan zattar tárkilendi.
Der kezinde polıtsııaǵa habarlasý arqyly zardap shegýshiler urlyqtyń izin sýytpaı ashýǵa kómektesti.
Atalǵan faktiler QR Qylmystyq kodeksiniń 188-babymen (Urlyq) sotqa deıingi tergeýdiń biryńǵaı reestrine tirkeldi.
Qazirgi ýaqytta kúdiktiniń ózge de qylmystarǵa qatysy bar-joǵy anyqtalýda. Tergeý amaldary júrip jatyr.
