Tirkelmegen «Alǵa» partııasynyń basshylarynyń biri Almatyda 2012 jyldyń naýryzyna lańkestik aktilerdi josparlaǵandarmen kelisimde boldy - Bas prokýratýra
ASTANA. 28 naýryz. QazAqparat - «Alǵa» tirkelmegen partııasy basshylarynyń biri jáne Mýhtar Ablıazovtyń eń jaqyn senimdi tulǵalarynyń biri bolyp tabylatyn, shetelde turaqty turatyn
Ketebaev Muratbek 2012 jyldyń naýryz aıynda Almatyda lańkestik aktilerdi ótkizýge daıyndalǵan Aleksandr Pavlovpen qylmystyq kelisimde bolǵan. Bul týraly QR Bas prokýratýrasynyń baspasóz qyzmetinen málim etti.
Prokýratýranyń aqparaty boıynsha, olar terrorızm jáne ekstremızm aktilerin uıymdastyrý jónindegi josparlaryn 2011 jylǵy qyrkúıekten beri oılastyryp kelgen.
2012 jylǵy naýryzdyń basynda olar ózderiniń sybaılastaryna Almaty qalasynyń qoǵamdyq jerlerinde, onyń ishinde saıabaqtar aımaǵynda jáne ákimshilik ǵımarattarynyń janynda jarylystar toptamasyn jasaýdy tapsyrǵan.
Atap aıtqanda, Pavlov oryndaýshyǵa Áýezov aýdanyndaǵy «Saryarqa» kınoteatrynyń artynda «Femelı» saıabaǵynda jarylysty uıymdastyrýdy, sondaı-aq jarylǵysh zattardy ál-Farabı dańǵylyndaǵy jaıaý júrginshiler ótpelerinde ornalastyrýdy tapsyrǵan.
Lańkestik aktilerdi uıymdastyrý úshin Pavlov 25 myń AQSh dollary kóleminde aqshalaı qarajat bólgen, onyń 15 myń dollary oryndaýshyǵa berilgen. Qalǵan 10 myń dollaryn teraktiler jasalǵannan keıin berý josparlanǵan.
Jedel-tergeý sharalarynyń barysynda terrorızmniń negizgi maqsaty retinde halyqty qorqytý, alasapyran men dúrbeleń jaǵdaıyn týdyrý, eldegi qoǵamdyq-saıası jaǵdaıdy turaqsyzdandyrý bolǵandyǵy anyqtaldy.
Atalǵan fakti boıynsha Qazaqstan Respýblıkasy Qylmystyq kodeksiniń 233-babynyń 1-tarmaǵy («Terrorızm») boıynsha qylmystyq is qozǵalyp, tergelýde.
Tergeý aıasynda quqyq qorǵaý organdaryna joǵaryda atalǵan tulǵalardyń sheteldikterdi qosa alǵanda radıkaldy ustanymdaǵy dinı toptardyń ókilderimen Qazaqstanda terrorıstik aktilerdi birlesip jasaý, sondaı-aq dinaralyq jáne ultaralyq turǵyda qaqtyǵystar týdyrý maqsatynda baılanys ornatý áreketteri týraly aqparat kelip tústi.
Tergeý júrgizilýde. Birqatar tulǵalar qazirgi kezde ustaldy jáne kinálaryn moıyndap aıǵaq berýde.
Basqa aqparat tergeýdiń múddesinde jarııalanbaıdy.
