Tiri jetim ósken aqtóbelik kelinshek qıyn taǵdyryn aıtyp berdi
AQTÓBE. QazAqparat - Aqtóbe qalasyndaǵy «Malıka» daǵdarys ortalyǵynda 50 adam turyp jatyr. Olardyń kóbi bala-shaǵa. Sebebi, kúıeýinen zábir kórgen áıelderdiń - 2, tipti 5 balasy bar. Eki jasynda anasy tastap ketip, ishimdikke áýes ákesimen qalǵan Oryngúl Oralova QazAqparat tilshisine jetim óskenniń qıyndyǵyn aıtyp berdi.
Aqtóbe oblysyndaǵy Jaısań balalar úıiniń túlegi Oryngúl Oralova qazir bir qyzyn ózi baǵyp otyr. Taǵdyry qıyn jas ana «Malıka» daǵdarys ortalyǵynyń quryltaıshysyn tanıdy, buryn jumys bergen basshy retinde syılaıdy. Basyna is túskende qaıta aınalyp kelip, bul joly qolyndaǵy kishkentaı qyzy úshin kómek surady.
«Biz Aqtóbe oblysy, Temir aýdanynyń Shubarqudyq aýylynda turǵanbyz. Men 2 jastan asqan kezde ákemiz iship, anamyz úıden ketip qalǵan. Tórt bala edik. Úlken aǵam ájemniń tárbıesinde bolyp, sodan keıingi eki aǵam Tamdy balalar úıinde, Alǵa balalar úıinde erjetti. Men bala boldym, esimdi bilmedim. Jaısań balalar úıinde boıjetip, oń-solymdy tanydym. 7-synypta oqyp júrgen kezimde meni aǵam izdep kelip, baýyrlarymnyń bar ekenin aıtty. Bári de jetim ósti, jaǵdaılary nashar. Men olardan kómek suraı almadym. Ákem 2007 jyly qaıtys boldy, anam bárimizdi tastap, basqa adamǵa turmysqa shyqty. Tanımyn, biraq aralaspaımyn. Balalary da bar ekenin bilemin»,- dedi aqtóbelik kelinshek Oryngúl Oralova.
Jaısań balalar úıiniń túlekteri bir-birine qamqor bolyp, únemi kómektesip turady. Alaıda olardyń bári ómirge beıimdelmegen.
«Jaısań balalar úıinde bizge tiginshi qosymsha mamandyǵy berildi. Biraq biz tigin mashınasyna otyryp, is tigýdi úırene almadyq. Sol kúıi kolledjdi bitirip shyqtyq. Kámelet jasqa tolǵan soń jetim ósken balalardy eshkim qaramaıdy, shyǵaryp jiberedi. Men sol bir top qyzben qalaǵa keldim, páter jaldadym. Biz balalar úıinde júrgende oblys ortalyǵyna kelmeımiz, sondyqtan qala ishin bilmeımiz. Kóshede júrip gazetten habarlama izdedik, teledıdardyń júgirtpe jolyn qalt jibermedik. Kolledjdi 2010 jyly bitirdim, sodan beri Aqtóbe qalasynda júrmin. Bala baqtym, qarııalarǵa kútim jasadym, ydys jýdym... Osylaı júrgende bir jigitpen tanystym, úsh jyl kezdesip, úılenýge sheshim qabyldaǵan edik. Anasy «jetim qyz, toı jasaǵanda onyń artynan eshkim kelmeıdi, quda-qudaǵıymyz bolmaıdy» dep bas tartty. Sodan júkti bolyp, qyzymdy bosandym. Qazir úsh jasta. Ózimniń janymnan qaldyrmaımyn. «Balalar úıiniń qyzdary adam sııaqty emes» degen sózdi jıi estımiz»,- dedi O.Oralova.
Aıta keteıik, Aqtóbe qalasynda «Malıka» daǵdarys ortalyǵy jumys istep tur. Qazir munda 18 qyz-kelinshek balalarymen turady.
Ortalyq dırektory Gúlbadan Daýyttyń aıtýynsha, kúıeýinen zábir kórgender men úısiz qalǵandardyń bári osy jerdi panalaıdy. Olar 6 aı ortalyqta tura alady. Eger kómekke áli de muqtajbyn dep eseptese - kelisimshart uzartylady.
«Bizge aýdandardan qyz-kelinshekter kóp keledi. Máselen, turmysqa shyǵyp, balaly bolǵan jas kelinshek bar. Balasy týa bitti sal aýrýyna shaldyqqan. Aıtýynsha, kúıeýi men qaıyn atasy «balań múgedek» dep úıden qýyp shyqqan. Taǵdyry qıyn adamdardyń bári Іshki ister organdarynan, jumyspen qamtý jáne áleýmettik baǵdarlamalar bólimderinen, ákimdikten estip keledi. Olarmen psıholog sóılesip, balalary balabaqshaǵa, mektepke ornalastyrylady, ózderi jumys isteıdi. Bári jumysqa arnalasty. Tamaqtaný, turý - tegin. Medıtsınalyq qyzmetkerler bar, kúni-túni kezekshilik qoıylǵan»,- dedi dırektory Gúlbadan Daýyt.
Ortalyqtyń kórsetken psıhologııalyq kómeginen keıin keıbir jas otbasylar tatýlasyp jatqanyn aıta ketý kerek.
