Tiri qalǵan ekinshi ushqyshqa kúrdeli ota jasaldy
ALMATY. QazAqparat – Áýe apatynda jaraqat alǵan ekinshi ushqysh Mırjan Moldaqulovtyń jaǵdaıy aýyr. Bul týraly dárigerler málimdedi, dep habarlaıdy QazAqparat tilshisi.
«Ekinshi ushqysh Mırjan Moldaqulovtyń jaǵdaıy aýyr. Búgin Nur-Sultan qalasynan kelgen áriptesterimizben birigip omyrtqasyna kúrdeli ota jasaldy. Ol áli narkozdan esin jııa qoıǵan joq. Ota sátti jasaldy», - dedi №4 qalalyq klınıkalyq aýrýhananyń bas dárigeriniń mindetin atqarýshy Aıman Baızoldanova.
Onyń aıtýynsha, bul aýrýhanada ushaqta bortserik bolǵan qyz da jatyr. Onyń jaǵdaıyn dárigerler orta deńgeıde dep baǵalap otyr.
Al bort komandıri oqıǵa ornynda kóz jumǵan bolatyn.
Aıta keteıik, keshe tańda Almatydan Nur-Sultan qalasyna ushyp shyqqan ushaq radardan joǵalyp ketti. Keıin ushaqtyń apatqa ushyraǵany málim boldy. Oqıǵanyń mán-jaıyn anyqtaý úshin ushaq qulaǵan aýmaqta arnaıy komıssııa jumys isteýde. Osy apatqa qatysty shuǵyl jeli iske qosylǵan.
