Tıranozavr men mamonttyń arqasynda Ulttyq mýzeıge kelýshiler sany 310 myńǵa jetti

ASTANA. QazAqparat - Osy jyldyń basynan QR Ulttyq mýzeıine 310 myń adam keldi. Salystyrmaly túrde, byltyr bir jylda Ulttyq mýzeıge 330 myń adam kelgen. Bul týraly Mádenıet jáne sport mınıstrliginiń áleýmettik jelilerindegi tikeleı efırde Ulttyq mýzeı dırektory mindetin atqarýshy Aıbek Sydyqov aıtty, dep habarlaıdy QazAqparat.

Ol kelýshilerdiń ósý dınamıkasynyń sebebin bıylǵy sáýirde eki jańa zaldyń ashylýymen baılanystyrady.

Bul barlyq jastaǵy kelýshiler úshin qyzyǵýshylyq týdyratyn Paleontologııa zaly men Qolónershiler ortalyǵy.

Paleontologııa zalynda tıranozavr, gıpparıon jylqysy, úlken múıizdi buǵy, alyp ındrıkoterıı múıiztumsyǵy, mamont jáne basqa da bizdiń zamanǵa deıingi ejelgi dáýirdegi janýarlardyń qańqalary men qaldyqtary bar.

Al, Qolónershiler ortalyǵynda túrli kádesyılar men sheberlerdiń úzdik sándik-qoldanbaly óner týyndylary usynylady.

Jyl basynan ulttyq mýzeıde 22 iri kórme ótti. Onyń 4-i halyqaralyq deńgeıdegi joba.

Sondaı-aq «Mýzeı túni» halyqaralyq aktsııasy aıasynda Ulttyq mýzeıge bir túnde 47 myńnan astam adam kelip, rekord ornatqan bolatyn.

Birinshi jartyjyldyqta mýzeı qory 4000-nan astam eksponatpen tolyqty.

«2014 jyldan beri Ulttyq mýzeı tarıhynda kelýshiler sany boıynsha eki iri kórsetkish tirkeldi. 2017 jyly, EKSPO halyqaralyq kórmesi aıasynda 280 myń adam kelse, byltyr bul kórsetkish 330 myń adamǵa jetti. Al, bıyl alǵashqy alty aıda ǵana 310 myń kelýshi tirkelip otyr. Bul qazaqstandyqtar men sheteldik qonaqtar tarapynan halqymyzdyń myńjyldyq mádenı murasy men tarıhyna qyzyǵýshylyqtyń artqanyn bildiredi»,- dedi QR Ulttyq mýzeıi dırektory m.a. Aıbek Sydyqov.