Tırannozavrdyń qańqasy Christie's aýktsıonynda 31,8 mln dollarǵa satyldy
NЬıÝ-IORK. QazAqparat – Seısenbi kúni Nıý-Iorktiń Christie's aýktsıonyndaǵy saýda-sattyqta tırannozavr kesirtkesiniń qańqasy 31,8 mıllıon AQSh dollarynan astam somaǵa satyldy, dep habarlaıdy QazAqparat aýktsıon úıiniń saıtyna silteme jasap.
«Christie's -te saýda-sattyqtyń álemdik rekordy ornady. «Sten» dep atalatyn tırannozavr 31 847 500 AQSh dollaryna satyldy», - delingen habarlamada..
Sıpattamada kórsetilgendeı, bul – tırannozavrdyń eń jaqsy saqtalǵan qańqalarynyń biri. Onda 188 súıek bar. Ony áýesqoı paleontolog Sten Sekrıson 1987 jyly Ońtústik Dakota shtatyndaǵy qazba jumystary kezinde tapqan. Bastapqyda onyń bul oljasy trıtseratop shópqorekti dınozavrynyń qańqasynyń bóligi delingen bolatyn. Tek 1992 jyly ǵana ǵalymdar tırannozavrdyń qańqasy tabyldy degen qorytyndyǵa keldi.
Sarapshylardyń pikirinshe, tırannozavrdyń salmaǵy 7-8 tonna, bul eresek afrıkalyq pildiń salmaǵynan eki ese kóp. Tisteriniń uzyndyǵy 27 sm-den asady.
Munyń aldyndaǵy rekord 23 jyl buryn ornatylǵan edi. 1997 jyly tırannozavrdyń qańqasy Chıkagodaǵy Fıld tabıǵı tarıhı murajaıynyń aýktsıonynda 8,36 mıllıon AQSh dollaryna satyldy.
