Tynyq muhıtyndaǵy elde alǵash ret bankomattar paıda boldy

ASTANA. KAZINFORM — Álemdegi eń shalǵaı elderdiń biri Tývalýda alǵash ret bankomattar ornatyldy. Buǵan deıin Tynyq muhıty aralynyń turǵyndary elektrondy bankıngke qol jetkize almaǵan, dep jazady AZERTADJ.

Brıtanııalyq The Guardian basylymynyń habarlaýynsha, bankomattardyń ornatylýy Fýnafýtı aralyndaǵy Vaıaký aýylynda saltanatty rásimmen atap ótildi. Іs-sharaǵa premer-mınıstr Feletı Teo jáne basqa da joǵary laýazymdy tulǵalar qatysty. Alǵashqy bankomattar Tývalý Ulttyq bankiniń bas keńsesinde ornatyldy.

Buǵan deıin elde barlyq qarjylyq operatsııa tek qolma-qol aqshamen júrgizilip kelgen. Jalaqy tólenetin kúnderi qyzmetkerler bankte uzyn-sonar kezekte turýǵa májbúr bolǵan, al bank saǵat 14:00–ge deıin ǵana istegen kórinedi. Azyq-túlik, qonaqúıde turý jáne túrli qyzmetterdiń aqysy únemi qaǵaz aqshamen tólenetin.

Bolashaqta ár aýylda jáne áýejaıda qosymsha bankomattar ornatý josparda bar. Turǵyndarǵa bank kartalary beriledi. Bul rette onlaın-bankıng qyzmetteri  alǵashqy kezde «adamdar úırengenshe» tegin usynylady dep túsindirdi premer-mınıstr. Bes bankomat pen 30 tólem termınalyn ornatýǵa 1,9 mıllıon dollar jumsaldy.

Aıta keteıik, Tývalýda shamamen 12 myń adam turady. Jańa bank tehnologııalaryn shamamen 6 myń klıent paıdalanady dep kútilip otyr.

Osydan buryn Tynyq muhıtynda Vanýatý mańynda qýatty jer silkinisi bolǵanyn jazdyq.