Tynyq muhıtynan Japonııaǵa qaraı qaýipti taıfýn jaqyndap keledi
ASTANA. KAZINFORM – Japonııanyń meteorologııa agenttigi demalys kúnderi elge Tynyq muhıty jaǵynan eki taıfýn jaqyndap, keı óńirlerde qurlyqqa shyǵýy múmkin ekenin eskertti. Eldiń batysy men shyǵysynda nóser jańbyr áli de jaýyp jatyr, dep habarlaıdy KyodoNews.
Sınoptıkterdiń málimetinshe, «Hıgos» taıfýny senbi kúni Japonııa jaǵalaýyna jetýi yqtımal. Sonymen qatar «Mekhala» taıfýny juma kúni eldiń ońtústik-batysyndaǵy Kagosıma prefektýrasynyń Amamı óńirine jaqyndap, keıin Kanto aımaǵyna qaraı jyljýy múmkin.
Qolaısyz aýa raıyna baılanysty JR Central kompanııasy senbi kúni tańerteńnen bastap Tokıo men Osakany jalǵaıtyn «Tokaıdo Sınkansen» joǵary jyldamdyqty poıyzdarynyń keıbir reısteri toqtatylýy nemese keshigýi múmkin ekenin habarlady.
Meteorologııa agenttiginiń boljamynsha, eki taıfýn bir-birine jaqyndaǵannan keıin álsirep, ekstratropıkalyq tsıklonǵa aınalady. Soǵan qaramastan turǵyndarǵa kóshkin, sý tasqyny jáne qatty jel qaýpine baılanysty saqtyq sharalaryn saqtaý eskertildi.
Japonııanyń Órt jáne tabıǵı apattarmen kúres agenttiginiń málimetinshe, juma kúni tańǵy saǵat 07:00-degi jaǵdaı boıynsha Kınkı jáne Kıýsıý óńirlerindegi 13 prefektýrada 2 mıllıonnan astam turǵynǵa evakýatsııalaý týraly nusqaý berilgen.
Kıoto prefektýrasyndaǵy Seıka qalasynda tańerteń bolǵan kóshkinnen keıin qalanyń keıbir aýdandarynda eń joǵary – besinshi deńgeıdegi qaýip jarııalandy.
Meteorologııa agenttiginiń dereginshe, seısenbi tańynan juma tańyna deıin Nagasakı prefektýrasyndaǵy Goto qalasynda 600 mm, al Kýmamoto prefektýrasyndaǵy Aso men Saga prefektýrasyndaǵy Ýresıno qalalarynda 500 mm-den astam jaýyn-shashyn túsken.
Sınoptıkter Okınava men Japonııanyń shyǵys óńirlerinde qatty jel soǵatynyn da eskertti. «Hıgos» taıfýny eldiń ońtústik jaǵalaýyn boılaı soltústikke jyljyǵan saıyn Tokaı jáne Kanto óńirlerinde jańbyr kúsheıedi dep kútilip otyr.
Boljam boıynsha, senbi túske deıin Tokaı óńirinde 300 mm-ge deıin, al Kanto–Kosın óńirinde 150 mm-ge deıin jaýyn-shashyn túsýi múmkin.
Juma kúni saǵat 11:00-degi málimet boıynsha, «Mekhala» taıfýny Okınavadaǵy Kýme araly jaǵalaýynda soltústik-shyǵys baǵytta saǵatyna 15 shaqyrym jyldamdyqpen jyljyp bara jatqan.
Aıta ketsek, beısenbi kúni Japonııada 6,9 baldyq qýatty jer silkinisi bolǵanyn jazdyq.
