Tinder-degi «Nuraı»: 4 mln teńgege alaıaqtyq jasaǵan jigit sottaldy

ASTANA. KAZINFORM — Astanada ınternet arqyly alaıaqtyq jasaǵan 20 jastaǵy qala turǵynyna úkim shyqty. Ol tanysýǵa arnalǵan Tinder qosymshasyna áıel adamnyń atymen «Nuraı» dep tirkelip, óziniń Telegram akkaýntyna silteme qaldyrǵan. Bul týraly A

stana qalasy prokýratýrasy málim etti.

— Telegram-da beıtanys qyzdyń sýretin qoıyp, jalǵan paraqsha ashqan. Sodan keıin jábirlenýshimen tildesip, kezdesýge ýáde berip, ártúrli syltaýlarmen odan aqsha suraı bastaǵan. Qaskóıdiń aram pıǵylynan beıhabar jábirlenýshi úsh aıǵa jetpeıtin ýaqyt ishinde 4 mln teńgeden astam qarjysyn aýdarǵan, — delingen habarlamada.

Sot aıyptalýshyny aqparattyq júıe paıdalanýshysyna qatysty iri kólemde jasalǵan alaıaqtyq úshin kináli dep tanydy.

Qylmystyq jaýaptylyqty jeńildetetin mán-jaılar — jasaǵan isine shyn ókinýi, keltirilgen múliktik zalaldy óz erkimen óteýi jáne aýyrlatatyn mán-jaılardyń bolmaýy eskerile otyryp, sot úkimimen oǵan 3 jyl merzimge bas bostandyǵyn shekteý jazasy taǵaıyndalyp, probatsııalyq baqylaý belgilendi.

— Internettegi senim úlken shyǵynǵa ákelýi múmkin. Vırtýaldy «tanystardyń» arbaýyna túspeýge jáne saq bolýǵa shaqyramyz, — dep eskertti prokýratýradan.