Tımýr Toqtabaev QR IDM-de etıka jónindegi ýákil bolyp taǵaıyndaldy

ASTANA. QazAqparat - Qazaqstandaǵy ortalyq memlekettik organdardyń biri bolyp Investıtsııalar jáne damý mınıstrligi etıka jónindegi ýákil taǵaıyndady. Endi bul mınıstrliktegi etıka jónindegi ýákil - Tımýr Serikuly Toqtabaev bolady. Bul týraly Feısbýk áleýmettik jelisindegi paraqshasynda vedomstvonyń kadr jumystary jónindegi departamentiniń dırektory Marat Iǵalı málim etti.

T.Toqtabaev Ulttyq qaýipsizdik komıteti akademııasyn quqyqtaný mamandyǵy boıynsha, Sátbaev atyndaǵy Qazaq ulttyq tehnıkalyq ýnıversıtetin geologııa mamandyǵy boıynsha, Kókshetaý memlekettik ýnıversıtetin qarjy mamandyǵy boıynsha támamdaǵan.

Eńbek jolyn 2003 jyly Ulttyq qaýipsizdik komıtetiniń organdarynda ofıtser qyzmetterin atqaryp, bastaǵan. 2006 jyly «Qazgeoaqparat» respýblıkalyq geologııalyq aqparat ortalyǵy basshysynyń orynbasary qyzmetine taǵaıyndalǵan. 2008 jyldan bastap Energetıka jáne mıneraldy resrýstar mınıstrliginiń Jer qoınaýlaryn paıdalaný departamentinde dırektor orynbasary, basqarma basshysy qyzmetterin atqarǵan. 2010 jyly «Taý-Ken-samuryq» Ulttyq taý-ken kompanııasynda quqyqtyq qamtamasyz etý departamentiniń dırektory qyzmetine taǵaıyndaldy.

2011 jyldyń tamyzynan beri sol kezdegi Indýstrııa jáne jańa tehnologııalar mınıstrliginde jer qoınaýyn paıdalaný departamenti dırektorynyń orynbasary qyzmetine taǵaıyndaldy. Qazirgi tańda Investıtsııalar jáne damý mınıstrliginiń jer qoınaýyn paıdalaný departamentiniń dırektory qyzmetin atqarady. Úılengen. Bir uly bar.

Etıka jónindegi ýákil degenimiz - qyzmettik etıkany qamtamasyz etý jónindegi qyzmetti qadaǵaldaıtyn memlekettik qyzmetker.