Tımýr Súleımenov: Freedom keshbekteriniń máselesin tekseremiz
ASTANA. KAZINFORM – Ulttyq bank tóraǵasy Tımýr Súleımenov Freedom Bank keshbekterimen baılanysty daýdy Astana halyqaralyq qarjy ortalyǵymen birge tekseretinderin aıtty.
- Meniń bilýimshe, banktiń ózi de túsinikteme berdi. Bul Astana halyqaralyq qarjy ortalyǵy arqyly qurylymdalǵan. Bizge jalpy Qazaqstan boıynsha retteýshi retinde bul máseleni qosymsha tekserý kerek. Astana qarjy ortalyǵymen sóılesemiz. Búkil normatıvtik-quqyqtyq negizdemelerdi tekseremiz. Sodan keıin baryp bul qalaı jumys isteıtinin anyqtaımyz. Olar engizgen kezde Astana qarjy ortalyǵymen sóıleskenbiz. Olar sol kezde óz erejelerine sáıkes ekenin aıtqan. Qazir qosymsha tekserý kerek bolyp tur. Jalpy bazalyq turǵyda AHQO-nyń quzyretin úılestirý kerek shyǵar. Onyń ishinde retteýshiler arasyndaǵy qarym-qatynasty da durystap úılestirý kerek, - dedi ol Parlament palatalarynyń birlesken otyrysynyń aldynda.
Buǵan deıin ol Freedom Bank-ten keshbek alǵan klıentterdiń salyq deklaratsııasyn tapsyrýy týraly pikir bildirgen bolatyn.