Tımýr Sultanǵazıev medıtsına qyzmetkerlerine tólem jasaýǵa qatysty túsinik berdi
NUR-SULTAN. QazAqparat – QR DSM Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Tımýr Sultanǵazıev medıtsına qyzmetkerlerine tólem jasaý máselesine qatysty túsinik berdi, dep habarlaıdy QazAqparat tilshisi.
«Medıtsına qyzmetkerlerine birjolǵy áleýmettik tólem jasaý máselesi ózekti ári óte mańyzdy. Densaýlyq saqtaý mınıstrligi epıdemııaǵa qarsy sharalarǵa qatysqan barlyq medıtsına qyzmetkerlerin tıisti áleýmettik tólemdermen qamtamasyz etý úshin barlyq qajetti sharalardy jasap jatyr. Medıtsına qyzmetkerlerine tólenetin birjolǵy áleýmettik tólem boıynsha qazirgi jaǵdaıǵa toqtalaıyn. Aýyrǵan dárigerler úshin jaǵdaı mynadaı sıpatta: pandemııa jarııalanǵannan beri elimiz boıynsha atalǵan ınfektsııa juqtyrǵan densaýlyq saqtaý qyzmetkerleriniń sany 12 830 adam. Onyń ishinde kásiptik qyzmetti júzege asyrý kezinde kovıd jáne pnevmonııamen syrtqattanýshylar boıynsha 8 442 ótinim kelip tústi, sondaı-aq olardy óńirlik komıssııalar qarady. Osylardyń ishinde óńirlik deńgeıde ótinimderdiń 68 paıyzy nemese 5 559-ynyń jaǵdaıy rastalǵan bolatyn», - dedi T. Sultanǵazıev Ortalyq kommýnıkatsııalar qyzmetinde.
Onyń sózine qaraǵanda, qazirgi kezde ótemaqyny 4 550 medıtsına qyzmetkeri aldy.
«Ólim jaǵdaılary boıynsha óńirlik komıssııalarda 82 jaǵdaı qaraldy, jalpy 182 jaǵdaıdyń ishinde. Qazirgi ýaqytta ótinimniń 45-i sáıkesinshe tólemaqyny alǵan bolatyn», - dedi komıtet tóraǵasy.
«Ótinimderdi qoldaý úshin Densaýlyq saqtaý mınıstrligi tıisti jumystardy jasap jatyr. Birinshiden, jumys tobyn quryp, ol onlaın rejımde ótinimderdi qabyldaýdyń barlyq sebepterin pysyqtaýda. Aýyrǵan jáne qaıtys bolǵan adamdar boıynsha derekterdi naqtylap, ótinimderdi rásimdeý jóninde jol berilgen ereje buzýshylyqtarǵa taldaý júrgizdi. Ekinshiden, Medıtsınalyq áleýmettik saqtandyrý qorymen birlesip, tıisti problemalar men qatelikterdi der kezinde sheshý jumystaryn júrgizýde. Sonymen birge, ótinimderdi qabyldaý protsesin jeńildetý úshin aýrýlardy kodtaýǵa jazbasha túsinikteme berip, qazirgi kezde qabyldanǵan ótinimder sany eki esege artty. Tórtinshiden, Densaýlyq saqtaý mınıstrligi ákimdikterden kún saıyn aqparat jınap, monıtorıng júrgizip jatyr», - dedi Tımýr Sultanǵazıev.
