Tımýr Súleımenov: Joldaý – Prezıdenttiń áleýmettik, saıası, ekonomıkalyq damý boıynsha óz kózqarasyn aıtý múmkindigi

NUR-SULTAN. QazAqparat – QR Prezıdent Ákimshiligi basshysynyń orynbasary Tımýr Súleımenov Prezıdenttiń Halyqqa Joldaýynyń qalaı ázirlengenin aıtyp berdi, dep habarlaıdy QazAqparat.

«Joldaýǵa daıyndyq protsesiniń óz reglamenti bar. Sebebi, Joldaý — strategııalyq qujattardyń biri. Bul – Memleket basshysynyń memleketti áleýmettik, saıası, ekonomıkalyq damytý boıynsha ultqa da, memlekettik apparatqa da, qoǵamǵa da óz kózqarasyn aıtý múmkindigi. Sáıkesinshe, Joldaý turaqty túrde júrgiziledi, ony retteıtin Prezıdent Jarlyǵy bar», - dedi Tımýr Súleımenov «Habar 24» arnasynda tikeleı efırde.

Onyń aıtýynsha, Joldaýdy sarapshylar toby ázirleıdi jáne munyń barlyǵy Prezıdent Ákimshiliginde toptastyrylady. Sarapshylar toby óńirlerdegi jaǵdaıdy eskerip, túıtkildi máseleler men pikirlerden turatyn aýqymdy aqparat kólemin súzgiden ótkizedi, tutas joba ázirlep shyǵady.

«Aqparattyq alań da nazarǵa alynǵanyn atap ótti. Sebebi biz ashyq qoǵamda ómir súrip jatyrmyz jáne azamattardyń tikeleı suranysyna salǵyrt qaraı almaımyz. Joldaý da osy baǵytta ázirlendi. Bul jańa Prezıdenttiń alǵashqy Joldaýy bolǵandyqtan, barlyq taqyrypty keńinen qamtýǵa tyrysty. Prezıdent halyqty tolǵandyryp júrgen barlyq máselelerge derlik toqtaldy», - dedi Tımýr Súleımenov.

Aıta keteıik, búgin QR Prezıdenti Qasym-Jomart Toqaev Qazaqstan halqyna Joldaýyn oqydy. Joldaýdyń tolyq mátini agenttik saıtynda jarııalanǵan.