Tımýr Súleımenov zeınetaqy qory qansha ınvestıtsııalyq tabys tapqanyn aıtty

ASTANA. KAZINFORM – QR Ulttyq bank tóraǵasy Tımýr Súleımenov Biryńǵaı jınaqtaýshy zeınetaqy qorynyń qansha ınvestıtsııalyq tabys tapqanyn aıtyp berdi.

«Biryńǵaı jınaqtaýshy zeınetaqy qorynyń zeınetaqy aktıvteri oń dınamıkany kórsetip jatyr. Jyl basynan beri zeınetaqy aktıvteri 18,4 trln teńgege deıin nemese 3,6% ósti. Investıtsııalyq tabys kólemi 351,1 mlrd teńge boldy. Zeınetaqy jarnalary 396,4 mlrd teńge, al jarnany merziminen buryn alý somasy 66,5 mlrd teńge boldy», - dedi T. Súleımenov Úkimettiń búgingi otyrysynda.

Sonymen birge, spıkerdiń aıtýynsha, Ulttyq Banktiń altyn-valıýta rezervteri altyn satyp alýǵa baılanysty jyl basynan 36,2 mlrd dollarǵa deıin nemese 0,5% ulǵaıdy.

«Ulttyq qor aktıvteri jyl basynan beri 60,2 mlrd dollar boldy. Bul rette, aqpan aıynyń qorytyndysy boıynsha 1,44% nemese 0,87 mlrd dollar ınvestıtsııalyq tabys tústi», - dedi Ulttyq bank tóraǵasy.

Buǵan deıin Tımýr Súleımenov jyldyq ınflıatsııa 9,3% deıin baıaýlaǵanyn jáne Ulttyq Bank bazalyq stavkany 14,75% deıin tómendetkenin baıandaǵan edi.