Tımýr Súleımenov úsh jyldyq ınflıatsııa boljamyn jarııalady

ASTANA. KAZINFORM — 2026 jyly ınflıatsııa 9,5-11,5 paıyz aralyǵynda qalyptasýy múmkin. Bul týraly Ulttyq bank tóraǵasy Tımýr Súleımenov aıtty.

— Osy jáne aldaǵy jylǵa josparlanǵan ınflıatsııa boljamy qazirgi makroekonomıkalyq jaǵdaılardy eskere otyryp qaıta qaraldy. Jańartylǵan baǵalaý derekterine sáıkes, 2025 jyly ınflıatsııa — 10,5-12,5, 2026 jyly 9,5-11,5 paıyz aralyǵynda qalyptasýy múmkin dep kútilýde. Bul boljamdar azyq-túlik baǵasynyń ósýine, jáne suranysqa qaraı joǵary proınflıatsııalyq qysymnyń qalyptasýyna baılanysty qaıta qaraldy. 2027 jylǵa arnalǵan boljam 5,5–7,5 paıyz deńgeıinde saqtaldy. Bul júrgizilip jatqan aqsha-kredıt saıasatynyń dezınflıatsııalyq áseri kúsheıgen saıyn jáne Úkimet tarapynan qarjylyq saıasattyń qataıýyna qaraı ınflıatsııanyń maqsatty dáńgeıge birtindep oralýy kútýdi bildiredi, — dedi Tımýr Súleımenov.

Onyń aıtýynsha, ınflıatsııanyń turaqty komponenti, ıaǵnı retteletin baǵalardy, janar-jaǵarmaı baǵasy men basqa da qubylmaly faktorlardy shegergendegi ınflıatsııa boljamdyq kezeńniń sońyna, ıaǵnı 2027 jylǵa qaraı 5 paıyzdyq maqsatty deńgeıge jetedi.

— Inflıatsııa boljamyna qatysty táýekelder ishki suranystan qalyptasqan qysymnyń kúsheıe túsýimen, syrtqy ortadan keletin teris áserlerdiń artýymen baılanysty. Onyń ishinde Reseıdegi ınflıatsııanyń qarqyn alýy, retteletin baǵalardyń ósýi jáne olardyń ınflıatsııalyq kútýler men ınflıatsııanyń ornyqty bóligine tıgizetin janama áseri bar, — dedi UB tóraǵasy.

Sondaı-aq ol bazalyq mólsherleme deńgeıin saqtaý sebebin túsindirgen edi.