Almaty oblysynda 215 zańsyz qoqys úıindisi anyqtaldy

QONAEV. KAZINFORM – 2024 jyly Almaty oblysynda júrgizilgen ǵaryshtyq monıtorıng kezinde 215 zańsyz qoqys orny anyqtaldy. 

Алматы облысында 215 заңсыз қоқыс үйіндісі анықталды
Фото: Жамбыл облысының прокуратурасы

Almaty oblysynyń aýmaǵynda 7 qoqys polıgon bar. Atap aıtar bolsaq, Qonaev, Alataý qalalary men Balqash, Eńbekshiqazaq, Qarasaı, Jambyl jáne Talǵar aýdandarynda. Onyń 4-i memleket menshiginde.

Jyl saıyn shamamen 430 myń tonna qaldyq jınalady. Budan basqa, suryptalǵan qaldyqtardyń 530 myń tonnasy Almaty qalasynan Qarasaı aýdanynyń Aıteı aýylyndaǵy polıgonǵa shyǵarylady.

— Byltyr Almaty oblysynda ǵaryshtyq monıtorıng júrgizilip, 215 sanktsııalanbaǵan qoqys úıindisi anyqtalyp, joıyldy. Sonymen qatar, sanktsııalanbaǵan polıgonnan shyǵýdyń 8 jaǵdaıy tirkeldi. Óńirde kólik shınalaryn, karton-qaǵaz, plastmassa, áınek jáne makýlatýra qaldyqtaryn qaıta óndeıtin 7 kásiporyn jumys isteıdi, — dep jaýap berdi Almaty oblysynyń turǵyn úı-kommýnaldyq sharýashylyq jáne abattandyrý basqarmasy Kazinform agenttiginiń saýalyna.
Qonaevtaǵy qyzmet kórsetý merziminen ótip ketken «Qarlyǵash» saıajaıy mańyndaǵy qoqys polıgonyna rekýltıvatsııa jumystary júrgiziletin bolady.

Qonaevta jańa polıgon qurylysy 2025-2026 jyldarǵa kózdelgen.

— Qonaev qalasynyń 2026 jylǵa deıingi keshendi damý josparyna sáıkes jańa qatty turmystyq qaldyq polıgon qurylysyn jáne qoqys suryptaý jelisin salý josparlanǵan. Búginde jobalyq-smetalyq qujattama ázirlenip jatyr. Polıgon qurylysy 2025-2026 jyldarǵa kózdelgen. Jańa polıgon salynǵannan keıin «Qarlyǵash» saıajaıy mańyndaǵy qoqys polıgonyna rekýltıvatsııa jumystary júrgiziletin bolady, — dep atap ótti basqarmadan.

Osyǵan deıin elimizde zańsyz qoqys tastaý jaǵdaılary jasandy ıntellektiniń kómegimen anyqtalyp jatqany týraly jazǵanbyz

Eske sala ketsek, Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda Astanada Jasandy ıntellekt ulttyq ortalyǵyn iske qosýdy tapsyrdy

Сейчас читают