Tımýr Súleımenov: Ulttyq bank aldynda ınflıatsııany 5%-ǵa deıin tómendetip ustaý maqsaty tur
ASTANA. KAZINFORM – Ulttyq bank tóraǵasy Tımýr Súleımenov BAQ ókilderine arnalǵan brıfıngte bazalyq mólsherlemeni 14,5%-ǵa deıin tómendetýge sebepker bolǵan faktorlardy atady.
Onyń sózinshe, mundaı sheshimge ınflıatsııa men ekonomıkalyq ósimniń jańartylǵan boljamdary, sondaı-aq, syn-qaterler teńgerimi men derekterdi taldaý negiz bolǵan.
«Qazirgi jaǵdaıda jyldyq ınflıatsııanyń boljamdarǵa sáıkes tómendegenin kórip otyrmyz. Naýryz, sáýir aılarynda baǵanyń ornyqty bóliginde ósimniń baıaýlaýy biz úshin jaǵymdy boldy. Bul ınflıatsııany tejeý saıasatyn ári qaraı jalǵastyra berý qajettigin rastaıdy», - dedi T.Súleımenov.
Ulttyq bank basshysy ınflıatsııanyń báseńdeýine jahandyq ınflıatsııa qysymynyń álsireýi, azyq-túlik baǵasynyń tómendeýi, baıypty qatań aqsha-kredıt saıasaty negiz bolǵanyn atap ótti.
«Sáýirde baǵanyń jyldyq ósimi 8,7% deńgeıinde boldy. Azyq-túlik taýarlarynyń ınflıatsııasy aıtarlyqtaı tómendep, 6,3%-ǵa jetti. Azyq-túlikke jatpaıtyn taýarlar baǵasynyń ósý qarqyny da baıaýlap, 7,6% boldy. Bul oraıda retteletin turǵyn úı-kommýnaldyq qyzmetter tarıfiniń ósýi aqyly qyzmetterdiń jyldyq mándegi ınflıatsııasyn 13,5%-ǵa deıin ósirdi», - dedi ol.
Ulttyq banktiń málimeti boıynsha, sáýirde aılyq ınflıatsııa 0,6% bolǵan. Bul ortasha tarıhı dınamıkaǵa saı. Sáýir aıynda ınflıatsııalyq kútýler de ósken. Keler jylǵa kútiletin ınflıatsııa 16,1% bolyp otyr.
«Respondentterdiń pikirinshe, baǵa ósiminiń joǵary boljamdaryna sý tasqyny jaǵdaıyndaǵy azyq-túlik baǵasynyń ózgerýi, turǵyn úı-kommýnaldyq qyzmetter reformasy áser etken. Óz kezeginde saýalnamaǵa qatysqan ekonomıkanyń naqty sektory keleshek ınflıatsııa týraly anaǵurlym ustamdy boljam berip otyr. Kásiporyndar daıyn ónim men shıkizattyń baǵasy baıaý ósedi dep kútedi. Qarjy naryǵyndaǵy kásibı oıynshylardyń sońǵy saýalnama nátıjeleri ınflıatsııa jyl sońyna deıin 8,5% deńgeıinde qalyptasady dep boljaıdy», - dedi Ulttyq bank tóraǵasy.
Tımýr Súleımenov Ulttyq bank aldynda ortamerzimdi keleshekte ınflıatsııany 5%-ǵa deıin tómendetip ustaý maqsaty turǵandyqtan qazirgi aqsha-kredıt sharttary eldegi ınflıatsııalyq protsesterdi odan báseńdetetinin aıtty.
