Tımýr Súleımenov: Úkimettiń tarıf reformasyn ýaqytsha shegergeni oryndy sheshim boldy

ASTANA. KAZINFORM – Ulttyq bank tóraǵasy Tımýr Súleımenov Úkimettiń kommýnaldyq tarıfterdi kóterý sharasyn keıinge qaldyrý týraly sheshimin ýaqtyly ári oryndy qadam dep baǵalaıtynyn aıtty.

Aıtýynsha, bul sheshim eldegi baǵany turaqtandyryp, ınflıatsııaǵa túsetin qysymdy báseńdetedi.

– Reforma bastalǵan kezde órshil qarqyn meje etip alynǵan bolatyn. Endi sony qaıta qaraý kerek bolyp tur. Biz Úkimet solaı istegenine qýanyshtymyz. Tarıftiń qarqyndy óspegeni ınflıatsııanyń ahýalyna áser etedi, - dedi Tımýr Súleımenov.

Sondaı-aq, ol tarıf reformasy bastalǵan kezde salyq saıasaty qalaı ózgeretini aıqyn bolmaǵanyn aıtady. Oǵan syrtqy ekonomıkanyń ahýaly, saýda rejımderiniń qubylýy qosylǵan.

- Bıznes jylýdyń nemese elektr qýatynyń aqysynyń óskenin kórgende ózi kórsetetin qyzmet pen óndiretin taýarǵa da baǵa qosady. Sondyqtan tarıfti birtindep, baqylaı otyryp kótergen mańyzdy, - dedi Ulttyq bank basshysy.

Eske salaıyq, búgin Ulttyq bank bazalyq mólsherlemeni taǵy ózgerissiz qaldyrdy.